चितवन, माघ १०–

राष्ट्रिय योजना आयोगका सदस्य प्रा डा गीताभक्त जोशीले कृषि तथा वन विज्ञान विश्वविद्यालय रामपुर चितवनमा बीउ प्रशोधन एकाइको आज एक कार्यक्रमबीच उद्घाटन गर्नुभयो ।

नेपालमा बीउ व्यवस्थापन गर्ने उद्देश्यले स्थापना गरिएको उक्त प्रशोधन एकाइमा गहुँको अनुवांशिकी प्राप्ति हस्तान्तरण परियोजना (डि जी जी डब्लु) अन्तर्गत बिल एन्ड मेलिन्दा गेट्स फाउण्डेसन र बेलायतको अन्तर्राष्ट्रिय विकास विभागको संयुक्त लगानी र सहयोग रहेको छ ।

सो अवसरमा राष्ट्रिय योजना आयोगका सदस्य जोशीले यस एकाइको दिगो विकासका लागि स्थानीय कृषकले सहयोग गर्नु पर्ने आवश्यकता औल्याउँदै यसले कृषकलाई उन्नत बीउ प्राप्त गर्नमा सहयोग पुग्ने विश्वास व्यक्त गर्नुभयो ।

कृषि सचिव डा सुरज पोख्रेलले कृषि क्षेत्रको विकासका लागि यस एकाइले महत्वपूर्ण भूमिका खेल्ने बताउँदै अहिले नेपालमा गुणस्तरीय बीउ उत्पादन हुन नसकेको समयमा यसले ठूलो सहयोग गर्ने विचार व्यक्त गर्नुभयो ।

अमेरिकास्थित कर्नेल विश्वविद्यालयका अन्तर्राष्ट्रिय कार्यक्रम निर्देशक रोनी कफम्यानले बीउबिजनको प्रशोधन र परीक्षण अति आवश्यक रहेको बताउँदै यसले कृषकलाई प्रत्यक्ष लाभान्वित हुने विश्वास व्यक्त गर्नुभयो ।

सो एकाइबाट हाल गहुँको बीउ प्रशोधन गर्ने भनिए पनि केही समयपछि धान र मकैको समेत बीउ प्रशोधन गरिने परियोजनाकी संयोजक डा शारदा थपलियाले जानकारी दिनुभयो ।

प्रतिघन्टा एक टन बीउ प्रशोधन गर्नसक्ने क्षमता रहेको सो एकाइको स्थापनासँगै कृषकसमक्ष वैज्ञानिक तरिकाले नउम्रने बीउ नपुगोस् भन्ने उद्देश्यकासाथ यसको स्थापना गरिएको उहाँले बताउनुभयो ।

प्रशोधन केन्द्रबाट प्रि क्लिनर, फाइन क्लिनर र ग्राबिटी सेप्लेटरका माध्यमबाट बीउलाई शुद्धीकरण गरी कृषकसमक्ष बीउ पु¥याउन सहज हुने विश्वास राखिएको परियोजनाका सहसंयोजक उदित प्रकाश सिग्देलले बताउनुभयो ।

बीउ प्रशोधन एकाइमा नेपाल सरकार, नेपाल कृषि अनुसन्धान परिषद् नार्क, अमेरिकास्थित कर्नेल विश्वविद्यालय र भारतको सद्गुरु म्यानेजमेन्ट कन्सल्ट्यानटको समेत सहयोग रहेको छ । करिब रु एक करोडको लागतमा बीउ प्रशोधन केन्द्रको स्थापना गरिएको हो । –रासस