चितवन, मंसिर २२–

पवित्र तीर्थस्थल देवघाटधाममा निर्माणधीन ३० फिट अग्लो राष्ट्रदेव भगवान शंकरको मुर्ति निर्माण सम्पन्न गर्नका लागि रत्ननगरमा महायज्ञ गरिने भएको छ ।
रत्ननगर–१ भक्तिनी बगैचामा रहेको दुर्गामन्दिरमा आउँदो पौष ४ गतेदेखि १२ गतेसम्म श्रीमदभागवत धनधान्याञ्चल एवं अष्टधातु संकलनका लागि महायज्ञ गर्न लागिएको आज मन्दिर परिसरमा आयोजित पत्रकार सम्मेलनमा जानकारी दिइयो । स्थानीय दुर्गामन्दिर ब्यवस्थापन समितिको र देवघाट संरक्षण प्रतिष्ठान चितवनको आयोजनामा महायज्ञ गर्न लागिएको हो । महायज्ञ सम्पन्न गर्नका लागि गीतानाथ अधिकारीको संयोजकत्वमा मुल समारोह समिति गठन गरेर तयारी थालिएको छ । पत्रकार सम्मेलनमा बोल्दै प्रतिष्ठानका अध्यक्ष राजेन्द्र पियाले गत साउन १९ गते शिलान्यास भइसकेको शंकरको मुर्ति निर्माण सम्पन्न गराउनका लागि सबैको सहयोग आवश्यक रहेको बताए । उनले ५ टन आठ प्रकारका धातु आवश्यक पर्ने भएकाले यस्तै धार्मिक कार्यक्रममार्फत भक्तजनहरुबाट धातु संकलन गर्ने लक्ष्य रहेको बताए । उनले घरमा फालिएका, खेर गइरहेका वा प्रयोग बिहिन रहेका तामा, पित्तल, सिल्बर, चरेस, ढलोटलगायतका विभिन्न धातुहरु महायज्ञमा दान गरिदिन पनि सबैमा आग्रह गरे ।
महायज्ञ मुल समारोह समितिका संयोजक अधिकारीले देवघाट सबैको जीवनको अन्तिम गन्तव्य भएकाले त्यहाँ निर्माणाधीन शंकरको मुर्तिका लागि सबैले सहयोग गर्नुपर्ने धारणा राखे ।
पुस १ गते तयारी स्वरुप कृष्ण मन्दिर चोकबाट भण्डारासम्म र्याली, पौष ४ गते देवघाटबाट जल ल्याइने, कलस पुजन गरिने, हवन गरिने र महायज्ञ उदघाटन गरिनेछ । महायज्ञ उदघाटनका लागि तत्कालिन मन्त्रीपरिषद्का अध्यक्ष खिलराज रेग्मी आउने आयोजकले जनाएको छ । त्यस्तै ५ गतेबाट कथा वाचन, भजन किर्त, दिप प्रज्वलन, फुल प्रसाद बितरण लगायतका कार्यहरु हुनेछन भने १२ गते एक समारोहका बिच महायज्ञ समापन गरिनेछ । महायज्ञमा सहयोग राशिअनुसार दाताहरुलाई सम्मान पत्र, दोसल्ला, शिलालेखमा नाम उल्लेख, हाति सवार गराई सम्मान गरिनेछ ।
देवघाट संरक्षण प्रतिष्ठानले देबघाट क्षेत्रलाई धार्मिक पर्यटकीय क्षेत्रको रुपमा अन्र्तराष्ट्रिय रुपमा परिचित गराउन धातुबाट निर्मित शंकरको मुर्ति बनाउन लागेको हो । मुर्ति निर्माण गर्न आवश्यक धातु संकलनको लागि प्रतिष्ठानले साउन महिनाबाट देशका विभिन्न ठाउँमा महायज्ञ गर्ने कार्यक्रम सुरु गरेको हो । पहिलो महायज्ञ दाङमा सम्पन्न गरेर दोश्रो महायज्ञ रत्ननगरमा गर्न लागेको हो । दाङमा आयोजना गरिएको महायज्ञबाट २ क्वीन्टल ५० किलो धातु र केही रकम संकलन भएको प्रतिष्ठानका अध्यक्ष पियाले बताए । मुर्ति निर्माण गर्न धातुसंगै ६० लाख रुपैयाँ खर्च हुने अनुमान गरिएको छ । महायज्ञमा युवा पण्डित अच्युतकृष्ण अधिकारीबाट कथाबाचन हुनेछ ।