चिनियाँ नयाँ वर्षमा पोखरामा वसन्त कला महोत्सव

पोखरा, माघ ९-

चिनियाँ नया वर्षको अवसरमा पोखरामा ‘वसन्त कला महोत्सव’ आयोजना गरिएको छ । चिनियाँ उद्यमी मञ्च, पोखरा उद्योग वाणिज्य संघ, लगायतको सहकार्यमा सरकारी समाचार एजेन्सी सिन्हृवाले पोखराको लेकसाइडस्थित अम्बोटमा शनिवार साँभ् भएको चिनिया संस्कृति सम्बन्धी ‘वसन्त कला महोत्सव’मा चिनियाँ पर्यटक रमाएका छन् ।

कार्यक्रममा चीनको हुनान प्रान्तका कलाकारहरुले सांस्कृतिक कार्यक्रम प्रस्तुत गरे । शुरुमा बाघेनाच प्रदर्शन गर्दै चिनियाँ नयाँ वर्षलाई स्वागत गरिएको थियो, जसलाई दर्शकहरुले औधी रुचाएका थिए ।

माघको चिसो साँझको समयमा करीब साढे २ घण्टा सडकमै चलेको कार्यक्रममा चिनियाँ संस्कृति झल्कने एकल तथा सामुहिक नृत्य प्रस्तुत गरिएको थियो ।

कार्यक्रम हेर्न पोखरा घुम्न आएका पर्यटक प्रायः सबै भेला भएका थिए भने काठमाडौंबाट पनि बस रिजर्भ नै गरेर चिनियाँ पर्यटक आएको आयोजकले बताएको छ ।कार्यक्रममा लेकसाइडसहित पोखराका विभिन्न क्षेत्रका स्थानिय तथा आन्तरिक पर्यटकको बाक्लो सहभागिता थियो ।