प्रधानमन्त्री पुष्पकमल दाहाल (प्रचण्ड)ले पोल्ट्री उद्योगलाई निश्चित समयका लागि आयकर छुट दिने घोषणा गरेका छन्।नेपाल पोल्ट्री महासंघको साधारणसभा उद्घाटन गर्दै आत्मनिर्भरतर्फ अगाडि बढेको पोल्ट्री उद्योगलार्इ निश्चित समय आयकर छुट दिएर प्रोत्साहन गरिने बताए।’यो क्षेत्र आत्मनिर्भरतर्फ अघि बढेको क्षेत्र हो’उनले भने, यो क्षेत्रको विकासका लागि केही समय आयकर छुटको व्यवस्था गर्छु।

उनले पोल्ट्री व्यवसायका लागि पाँच प्रतिशत ब्याजमा ऋण पाउने व्यवस्था कार्यान्वयनमा ल्याउने प्रतिवद्धता जनाए। कृषि क्षेत्रका लागि सरकारले पाँच प्रतिशत ब्याजमा ऋण दिने व्यवस्था ल्याएको थियो।

उनले पोल्ट्रीका लागि आवश्यक मेसिनरी ल्याउँदा भन्सारको एचएस कोडका कारण रोकिएको बताउँदै यो प्राविधिक कठिनार्इ हटाउन तत्कालै सम्वन्धित मन्त्रालयलार्इ निर्देशन दिने बताए। प्रचण्डले औद्योगिक क्षेत्रको समस्या समाधानका लागि सरकार र निजी क्षेत्र सम्मिलित कार्यदल बनाउने बताए।

कार्यक्रममा नेपाल पोल्ट्री महासंघका अध्यक्ष गुणचन्द्र बिष्टले राजनीतिक दलले आत्मनिर्भर भएको क्षेत्रलार्इ बढावा दिन कन्जुस्यार्इ भइरहेको बताए।उनले राजनीतिक अस्थिरता, बन्द र हड्ताल लगायतका चुनौतिका बाबजुदपनि पोल्ट्री क्षेत्र आत्मनिर्भर भएको बताउँदै यो क्षेत्रको विकासबाट अर्बौ रुपैयाँ बचत भएको बताए। बिष्टले उद्योगीलार्इ हेर्ने दृष्ट्रिकोण सकारात्मक नभएको बताउँदै उद्योगका लागि जग्गा खरीद गर्ने वित्तिकै धेरैथरी समूह लागेर समस्या पार्ने गरेको बताए।

उनले उद्योगीले आफ्ना उत्पादन बिक्री गर्दा समेत कालोबजारीको आरोपमा प्रक्राउ पर्ने अवस्था रहेको बताउँदै राज्यले उद्योगीलार्इ हेर्ने दृष्ट्रिकोण अझै पुरातन रहेको बताए।उनले आयातित वस्तुलार्इ सहज प्रवेश र स्वदेशी वस्तुलार्इ भने परीक्षणको वहानामा निरुत्साहित गर्ने प्रवृतिले स्वदेशी उद्योग फष्टाउन नसकेको बताए।

‘अहिले एउटा मात्रै क्षेत्र पोल्ट्री आत्मनिर्भर छ। यो क्षेत्रको विकासले आयात गरेर पोल्ट्रीजन्य वस्तु ल्याउनुपरेको छैन’उनले भने,यसले राज्यको अर्बो रुपैयाँ बचत भएको छ। नेपाल उद्योग वाणिज्य महासंघका उपाध्यक्ष दिनेश श्रेष्ठले प्रतिकुलताका बाबजुद पोल्ट्री क्षेत्रमा भएको विकास प्रशंसनीय रहेको बताए।

मुलुकमा अहिले पोल्ट्री क्षेत्रमा ९६ वटा दाना उद्योग, दुर्इ सय ह्याचरी उद्योग, ४ सय ५० ठूला ब्यवस्थित फार्म गरि करिब १६ हजार व्यवसायी यो क्षेत्रमा रहेको महासंघका पूर्व अध्यक्ष डा. तिलचन्द्र भट्टराईले बताए।

एक लाख ५० हजार व्यक्तिलाई प्रत्यक्ष रोजगारी दिएको यो क्षेत्रले राष्ट्रिय आयमा करिब ७० अर्ब रुपैयाँ बराबरको योगदान दिएको  भट्टराईले बताए।राज्यले केही सहुलियत दिएमा आगामी पाँच वर्षमा अहिलेको उत्पादनलाई दोब्बर बनाउन सकिने उनले बताए।

गत आर्थिक वर्षमा १० करोड  ७९ लाख किलो मासु र एक अर्ब ३४ करोड गोटा अण्डा उत्पादन भएको थियो। नेपालमा अहिले ७ करोड २५ लाख कुखुरा वर्षेनी उत्पादन हुने गरेको उनले बताए।

१९८० मा ७० दिनमा दुर्इ किलो मासु उत्पादन हुने गरेकोमा अहिले २०१५ मा आईपुग्दा ३८ दिनमा दुई किलो कुखुरा तयार हुन्छ। त्यो समयमा साढे तीन किलो दाना खाएर एक किलो मासु उत्पादन हुने गरेकोमा अहिले दुई किलो दाना खाँदा एक किलो मासु उत्पादन हुने गरेको छ।

अहिले नेपालीले एक वर्षमा सरदर प्रतिव्यक्ति ४७ गोटा अण्डा र ३.८ केजी मासु मात्रै खपत गरेको देखिन्छ। अन्य एसियाली देशमा यो खपत दोब्बर भन्दा बढी अर्थात ९ देखि १० किलो मासु र १ सय १० गोटा अण्डा प्रतिव्यक्ति खपत रहेको उनले बताए।

दाना, चल्ला, मासु र अण्डा उत्पादनमा नेपाल पूर्ण रुपमा आत्मनिर्भर छ। अहिलेको कुखुरा उत्पादनको लागि करिब १५ अर्ब रुपैयाँ बराबरको मकै र भट्टमासको पिना आयात हुन्छ। नेपालमै मकै र भट्टमास उत्पादन गर्न सकिएमा वार्षिक १५ अर्ब रुपैयाँ बराबरको आयात घटाउन सकिने भट्टराईले बताए।