Gaule Khabar
आइतवार, साउन २९, २०७९
Gaule Entertainment Media Group Pvt.Ltd.

कालोबजारी आरोपमा दुई अध्यक्ष पक्राउ

  • admin
  • बुधबार, मंसिर २९, २०७३
कालोबजारी आरोपमा दुई अध्यक्ष पक्राउ

गौशाला, मंसिर २९ –

महोत्तरी प्रहरीले मङ्गलबार जिल्लाको दुई स्थानबाट कालोबजारी गरेको आरोपमा दुईवटा सहकारी संस्थाका अध्यक्षलाई पक्राउ गरेको छ ।

पक्राउ पर्नेमा जिल्लाको सोनौल–४ बस्ने स्थानीयवासी सीता कृषि सहकारी संस्थाका अध्यक्ष सीताप्रसाद भगत र रामगोपालपुर–९ बस्ने स्थानीयवासी शिवाजी सहकारी संस्थाका अध्यक्ष गणेश राउत कुर्मी रहेको जिल्ला प्रहरी कार्यालय महोत्तरीका प्रहरी उपरीक्षक नलप्रसाद उपाध्यायले बताउनुभयो ।

पक्राउ परेका अध्यक्षद्वयले किसानलाई सहुलियत दरमा बिक्री गर्ने उद्देश्यले सरकारी अनुदानमा गहुँको बीउ ल्याएर मनपरी ढङ्गले बढी मूल्यमा बिक्री गरेको आरोपमा प्रहरीले उनीहरुलाई पक्राउ गरेको हो । पक्राउ परेका अध्यक्ष भगतले गहुँको बीउ प्रतिबोरा ४० किलोको एकहजार सातसय २० मा बेच्नुपर्नेमा दुईहजार पाँचसयमा बेचेको र अध्यक्ष कुर्मीले प्रतिकिलो रु ४३ मा बेच्नुपर्नेमा प्रतिकिलो रु ६५ मा बेचेको गुनासो आएपछि जिल्ला कृषि विकास कार्यालयका प्रमुख सुकेश्वर झा, जिल्ला प्रशासन कार्यालयका प्रशासकीय अधिकृत रमेश अधिकारी सहितको अनुगमन टोलीले दुवै अध्यक्षलाई रङ्गेहात पक्राउ गरेको जनाइएको छ ।

अनुदानको बीउमा किसानलाई ठगी गरेका दुवै सहकारी संस्थाका अध्यक्षलाई पक्राउ गरी दुवैमाथि कालोबजारी मुद्दा चलाइएको प्रहरीले जनाएको छ ।

पाँच चोर पक्राउ

यसैगरी, महोत्तरी जिल्लाको बर्दिबास बजार क्षेत्रमा चोरी गर्दै हिँडेका पाँचजनालाई प्रहरीले पक्राउ गरेको छ । पक्राउ पर्नेमा पर्सा जिल्लाको टेरा–९ बस्ने १८ वर्षीय प्रमोदकुमार राय नट, बारा जिल्लाको जितपुर–९ बस्ने १८ वर्षीय राजन कुमार नट, ४५ वर्षीय जगरनाथ नट, रामलाल नट र ४० वर्षीय जगदीश राय नट रहेको इलाका प्रहरी कार्यालय बर्दिवासका प्रहरी नायब उपरीक्षक शालिग्राम शर्माले बताउनुभएको छ ।

बर्दिवास नगरपालिकामा रहेका बजार तथा राजमार्ग क्षेत्रमा बटुवा तथा सर्वसाधारणको रकम र गरगहना लुटपाट हुन थालेपछि इलाका प्रहरी कार्यालय बर्दिवासबाट व्यापक रुपमा प्रहरी परिचालन गरी उनीहरुलाई मङ्गलबार साँझ पक्राउ गरेको हो ।

बर्दिवास नपा–१ स्थित तरकारी बजारमा रहेको लक्ष्मी अधिकारीको पसलबाट चोरी गरेका दुई तोला सुन, लत्ताकपडा र केही रकमसमेत उनीहरुबाट बरामद गरेको प्रहरीले जनाएको छ । प्रहरीले पक्राउ गरेका पाँचै जनामाथि डाँका मुद्दा दर्ता गरी आवश्यक कारबाही अगाडि बढाएको प्रहरी नायब उपरीक्षक शर्माले बताउनुभयो । – रासस

तपाइको प्रतिक्रिया दिनुहोस्

Your email address will not be published.

हामी तपाईंको इमेल अरू कसैसँग साझा गर्दैनौं।

ट्रेन्डिङ