राष्ट्रिय खेलकुदका लागि करातेको छनौट खेल चितवनमा
चितवन, मंसिर २३–
चितवनको भरतपुरमा आज (बुधबार) देखि सातौं राष्ट्रिय खेलकुदका लागि कराते तर्फको मध्यमाञ्चल स्तरीय छनौट प्रतियोगिता सुरु भएको छ ।
कवर्ड हलमा सुरु भएको प्रतियोगिताको चितवन क्षेत्र नं.२ का साँसद शेषनाथ अधिकारीले एक कार्यक्रमकाबीच समुद्घाटन गर्नुभयो । उद्घाटन कार्यक्रममा प्रमुख जिल्ला अधिकारी नारायणप्रसाद भट्ट, जिल्ला खेलकुद विकास समिति चितवनका अध्यक्ष गंगालाल लामा, मध्यमाञ्चल खेलकुदका उपाध्यक्ष परमेश्वर खनाललगायतको उपस्थिति रहेको थियो ।
प्रतियोगितामा चितवनसहित बारा, पर्सा, रौतहट, महोत्तरी, नुवाकोट, सर्लाही, काभ्रेपलाञ्चोकलगायतका जिल्लाका कराते खेलाडीहरुको सहभागिता रहेको छ । मंसिर २६ गतेसम्म चल्ने प्रतियोगिताबाट छनौट हुने खेलाडीहरुले मध्यमाञ्चलको प्रतिनिधित्व गर्दै पूर्वाञ्चलमा हुने सातौं राष्ट्रिय खेकलुद प्रतियोगितामा सहभागिता जनाउन पाउने छन् ।
