लहान, माघ २२–

मधेसी जनअधिकार फोरम (लोकतान्त्रिक) का अध्यक्ष विजयकुमार गच्छदारले परिमार्जनसहित संविधान संशोधन प्रस्ताव पारित नभएसम्म आफ्नो पार्टीले निर्वाचनमा भाग नलिने बताउनुभएको छ ।

सिरहाको गोलबजारमा आज आयोजित अगुवा कार्यकर्ता भेलालाई सम्बोधन गर्दै अध्यक्ष गच्छदारले संविधान संशोधन प्रस्ताव परिमार्जनसहित पास नहुन्जेलसम्म निर्वाचन हुनै नसक्ने र भए पनि आफ्नो पार्टीले निर्वाचनमा भाग नलिने बताउनुभयो ।

सरकार संविधान संशोधन नगरी हावाको भरमा चुनावको घोषणा गर्न लागेको बताउँदै उहाँले यथास्थितिमा सार्थक निर्वाचन सम्भव नहुने दाबीसमेत गर्नुभयो ।

मुलुकको अवस्था अत्यन्त सङ्कटपूर्ण अवस्थामा रहेका कारण विकाससमेत अवरुद्ध भएको बताउँदै पूर्व उपप्रधानमन्त्री गच्छदारले ठूला दलका नेताहरु देशको समस्याप्रति गम्भीर हुन नसकेको आरोपसमेत लगाउनुभयो ।

संविधानसभामार्फत जनपक्षीय संविधान बनाउने जनताको चाहना अझै पनि पूरा हुन नसकेको गुनासो गर्दै उहाँले भन्नुभयो –“संविधान त बनेको छ तर, त्यो मधेसी, जनजाति, थारुलगायतलाई स्वीकार्य छैन, यसलाई आवश्यक परिमार्जनसहित संशोधन गर्नुपर्छ ।” परिमार्जनसहित संविधान संशोधन भएपछि मात्र निर्वाचनको वातावरण बन्ने उहाँको भनाइ थियो ।

कार्यक्रममा केन्द्रीय उपाध्यक्ष जितेन्द्रनारायण देव, महिला नेत्री गीतादेवी चौधरी, युवा फोरमका केन्द्रीय अध्यक्ष बेदनारायण गच्छेदारलगायतले पनि बोल्नुभएको थियो ।