जग्गाको लालपुर्जा नभएकाले १० हजार धरौटी राखेर विद्युत मिटर पाउने

नवलपरासी, पुस ७ –

सुकुम्बासी तथा गुठी लगायतको जग्गामा बसोबास गर्ने बासिन्दाले घरमा विद्युत मिटर जडान गर्न १० हजार रुपैयाँ धरौटी राख्नुपर्ने भएको छ ।

जग्गा धनी प्रमाण पत्र नभएकाले विद्युत चोरी गरी प्रयोग गर्ने भएपछि नेपाल विद्युत प्राधिकरण सञ्चालक समितिको बैठकले धरौटी राख्नुपर्ने निर्णय गरेको हो ।

जग्गाको पुर्जा नहुँदा मिटर राख्न नपाएका नवलपरासी कावासोती–१३ का बासिन्दाले भने धरौटी राख्ने व्यवस्था राम्रो भएपनि पैसा महंगो भएको गुनासो गरेका छन् । स्थानीय बासिन्दा धनमाया महत्तो भन्नुहुन्छ, ‘मिटर नराख्दा विद्युत चेरेको जस्तो देखिने, पैसा तिरेर बाल्छौँ भन्दा धरौटी नै धेरै भएकोले अफ्ठ्यारो भएको छ ।’

नवलपरासीको कावासोती–१३ बुढौलीकुनाका १७ घरको जग्गाधनी प्रमाण पत्र पनि छैन । उनीहरुलाई बिजुली पनि छैन । ‘विद्युत मिटर चाहियो भन्दा धरौटीको कुरा आएको छ हामी सुकुम्बासीले १० हजार रुपैयाँ कसरी जुटाउने’ स्थानीय बासिन्दा ओममाया गाहाले भन्नुभयो ।

नेपाल विद्युत प्राधिकरण वितरण केन्द्र कावासोतीका प्रमुख उमेशप्रसाद यादवले नगरपालिकाले सिफारिस गरे मिटर जडान गरिदने बताउनुभयो । नगरपालिकाले गर्ने सिफारिसमा बसोबास गरेको घर जग्गा व्यक्तिको निजी हो भन्ने ब्यहोरा नभएकाले सिफारिस गर्न नसकिएको कावासोती नगरपालिकाले जनाएको छ ।

विद्युत चुहावट रोक्ने अभियान अन्तर्गत सुकुम्बासी र गुठीको जग्ग्मामा घर भएकालाई विद्युत मिटर दिनका लागि धरौटीको व्यवस्था गरेको यादवले जानकारी दिनुभयो । ‘टहरामा बस्नेलाई पनि हामी मिटर दिन्छौँ तर धरौटी त राख्नु पर्र्यो नि’ यादवले भन्नुभयो ।