भोजपुरको सिद्धेश्वरमा बस दुर्घटना हुँदा नाै जना घाइते

गाउँले न्युज, २६ साउन, काठमाण्डौ । भोजपुरको सिद्धेश्वरमा आज (आइतबार) बिहान बस दुर्घटना हुँदा नाै जना घाइते भएका छन ।

टेम्केमैयुङ गाउँपालिकाबाट भोजपुर हुँदै विराटनगरका लागि छुटेको मे १ ख ३१६४ नम्बरको विराटेश्वर बस भोजपुर नगरपालिकाको मध्यपहाडी लाेकमार्ग सडकखण्ड अन्तर्गत सिद्धेश्वरमा बिहान साढे ६ बजेतिर दुर्घटना भएको जिल्ला प्रहरी कार्यालय भोजपुरले जनाएको छ ।

जिल्ला प्रहरी कार्यलय भोजपूरका अनुसार बसले घुम्ती काट्ने क्रममा भित्तामा ठोकिएर दुर्घटना भएको हो । दुर्घटनामा परी घाइते हुनेहरुमा झापा ५ का ३० वर्षीय अर्जुन लिम्बू, भोजपुर नगरपालिका ३ की २२ वर्षीया संगीता प्रधान, भोजपुर नगरपालिका ९ की २४ वर्षीया मनिषा श्रेष्ठ, वर्ष १७ की अस्मिता श्रेष्ठ, टेम्केमैयुङ गाउँपालिका ३ की ५५ वर्षीया गंगादेवी राई छन् ।

यसैगरी भोजपुर नगरपालिका ३ का ३१ वर्षीय गोविन्द प्रधान, इलाम चुलाचुली गाउँपालिका १ घर भएका ३५ वर्षीय चालक सन्तकुमार फागो, मोरङ रतुवामाई नगरपालिका ७ की २१ वर्षीया सविना गौतम र भोजपुर नगरपालिका ३ बस्ने ११ वर्षीय विवेक श्रेष्ठ रहेको जिल्ला प्रहरी कार्यलय भोजपुरले जनाएको छ ।

जिल्ला अस्पताल भोजपुरमा घाइतेहरुकाे उपचार भइरहेको छ । घाइतेहरुको हात, खुट्टा, अनुहार र शरीरका विभिन्न भागमा चोट छ । बसमा १२ यात्रु सवार रहेको प्रहरी चौकी गुप्तेश्वरले जनाएको छ ।