बंगाली हिरोइन बितास्ता साह पंखामा झुन्डिए भेटिइन्
भारत ,माघ २७ –
बंगाली फिल्म अभिनेत्री बितास्ता साह मंगलबार मृत फेला परेकी छिन् । कोलकत्तास्थित करबा इलाकाको फ्ल्याटमा एक्लै बस्दै आएकी २८ वर्षीया बितास्ताको शव पंखामा झुन्डिएको थियो । दुई दिनदेखि फोन नउठाएपछि बितास्ताकी आमा उनको फ्ल्याटमा पुगेकी थिइन् ।
धेरै बेरसम्म ढोका ढकढक्याउँदा पनि नखुलेपछि आमाले पुलिसलाई खबर गरेकी थिइन् । पुलिसले ढोका खोलेर हेर्दा बितास्ता पंखामा झुन्डिरहेकी थिइन् । उनको हातको नसा पनि काटिएको थियो । झट्ट हेर्दा आत्महत्या देखिए पनि उनको शरीरमा चोट देखिएकाले शंका गर्ने ठाउँ रहेको भारतीय अनलाइनले उल्लेख गरेका छन् ।
पछिल्लो केही समययता बितास्ता डिप्रेसनमा रहेको बताइन्छ । उनले गत ९ डिसेम्बरमा आफ्नो फेसबुकमा ‘मर जाना अच्छा होता’ भनेर पोस्ट गरेकी थिइन् । त्यसपछि पनि उनले निराशावादी भावयुक्त स्टाटस पोस्ट गर्ने गरेकी थिइन् ।नयाँ पत्रिकामा खबर छ ।
डिप्रेसनका कारण उनले आत्महत्या गरेको हुन सक्ने प्रारम्भिक अनुमान गरिएको छ । पुलिसले उनको फोन कल डिटेल परीक्षण गरी सत्यतथ्य पत्ता लगाउने जनाएको छ । बितास्ता अभिनीत फिल्म ‘बन्छ इलो फिरे’ गत अक्टोबरमा रिलिज भएको थियो । तीन वर्षअघिदेखि फिल्म अभिनयमा रहेकी बितास्ताले अहिलेसम्म जम्मा तीन फिल्ममा अभिनय गरेको बताइएको छ ।
