धान खरिद सुरु
नेपालगन्ज, मंसिर २९ –
नेपाल खाद्य संस्थानको अञ्चल कार्यालयले आजदेखि कृषकसँग धान खरिद सुरु गरेको छ ।
समर्थन मूल्य निर्धारण समितिले धानको मूल्य तोकेको करिब दुई सातापछि संस्थानले कारकाँदोस्थित आफ्नो कार्यालयबाट धान खरिद सुरु गरेको हो । मोटा धान प्रतिक्विन्टल रु दुई हजार ५० र मध्यम धानको रु दुई हजार १५० मूल्य निर्धारण गरेको कार्यालय प्रमुख मोतीराज ज्ञवालीले जानकारी दिनुभयो ।
पहिलो चरणमा २० हजार क्विन्टल धान खरिद गर्ने लक्ष्य रहेको ज्ञवालीको भनाइ छ । गत वर्ष मोटा धान प्रतिक्विन्टल रु एक हजार ९२५ र मध्यम धान रु दुई हजार ५० मा खरिद गरिएको थियो । – रासस
