गगनले पुरा गरे बाचा, अब नेपाल मै कलेजो प्रत्यारोपण
काठमाडौं, मंसिर १६–
स्वास्थ्य मन्त्रालयले नेपालमै कलेजो प्रत्यारोपण शुरु गर्ने भएको छ । स्वास्थ्य मन्त्रालयले ल्याएको मानव अंग प्रत्यारोपण नियमावली २०७३ ले कलेजो प्रत्यरोपणको बाटो खुल्ला गरेको हो । नियमावलीले कलेजो प्रत्यारोपणसँग ब्रेन डेथबाट मृत्यू भएकाहरुको आठ वटा अंग लिने र प्रत्यारोपण गर्नेबाटो समेत खुल्ला गरेको छ ।
स्वास्थ्य मन्त्री गगन कुमार थापाले मन्त्रालयको पदभार सम्हालेसँगै ६ महिना भित्र नेपालमा कलेजो प्रत्यारोपण शुरु गर्ने घोषणा गर्नुभएकोमा तीन महिनामै घोषणा पुरा भएको हो । नेपालका कलेजो रोगीहरुले कलेजो प्रत्यारोपण गर्न चाहेपनि नियमको अभावमा विदेशमा गएर करोडौ रुपैयाँ खर्च गरेर प्रत्यारोपण गर्दै आएका थिए ।
कलेजो प्रत्यारोपणमा विदेशमा एक करोड रुपैयाँ सम्म खर्च हुने गरेकोमा नेपालमा १५ देखि २० लाख रुपैयामा प्रत्यारोपण गर्ने तयारी गरिरहेको मानव अंग प्रत्यारोपण केन्द्रका निर्देशक डा श्रेष्ठले बताउनु भएको छ ।
मानव अंग प्रत्यारोपण केन्द्रले त्यसको प्राविधिक तयारी गरिरहेको छ । केन्द्रले कलेजो प्रत्यारोपण सम्बन्धी ख्याति प्राप्त डाक्टर सहितको विदेशी टोली बोलाएर केही हप्तापछि नेपालमा कलेजो प्रत्यारोपण शुरु गर्ने तयारी गरेको उहाँले बताउनु भयो ।
केन्द्रका निर्देशक डा श्रेष्ठले लामो समय सम्म हुन नसकेको यो काम अहिलेका स्वास्थ्य मन्त्री थापाको विषेश चासो र सक्रियताले संभव भएको बताउनु भयो । “नियमावली पास गर्न मन्त्रीज्यूले गर्नु भएको तदारुकताबाट ब्रेन डेथ भएकाको अंग निकाल्न र कलेजो प्रत्यारोपण गर्न खुल्ला गरेर हामीलाई थप उत्साहित बनाएको छ,” डा श्रेष्ठको भनाई छ ।
