काठमाण्डौं । नेपाल विधुत प्राधिकरणले सोलुखुम्बु जिल्लामा ग्रामीण विधुतीकरणका लागी टेन्डर आव्हान गरेको छ ।

संघीय संसद प्रतिनिधिसभाका सदस्य हेमकुमार राईको पहलमा उज्यालो सोलुखुम्बु अभियान अन्तर्गत चालु आर्थिक बर्षका लागि बिनियोजित रकम मध्येबाट ७२ करोडको ठेक्का आव्हान भएको सांसद राईको सचिवालयले जनाएको छ । जिल्लामा ग्रामीण विधुतीकरणका लागि झण्डै ३ अर्बको स्टिमेट सर्बे सम्पन्न भइ सकेको सांसद राईले जानकारी दिए ।

पहिलो चरणमा आव्हान भएको ७२ करोडको टेन्डरबाट जिल्लाको महाकुलुङ गाउँपालिका बाहेकका अन्य ७ वटा स्थानीय तहमा पोल, तार र ट्रान्समिटर जडानको काम हुने बताईएको छ।

महाकुलुङ गाउँपालिकाको विधुतीकरणका लागि भने यस अघि नै १५ करोडको टेण्डर आव्हान भइ सकेको छ । उर्जा मन्त्रालय अन्तर्गतको सामुदायिक ग्रामीण विधुतीकरण संस्थाको ९० प्रतिशत र गाउँपालिकाको १० प्रतिशत लगानीमा १५ करोडको टेन्डर आव्हान भएको सांसद राईले जानकारी दिए ।

विधुतीकरणको उद्देश्यले जिल्लाका लागि बिनियोजित बजेटबाट छिटै अर्को चरणको टेण्डर आव्हान हुने समेत सांसद राईको भनाई छ।दोश्रो चरणमा देउसा र खरिखोलामा सव स्टेसन निर्माणसँगै अभियानलाई पूर्णता दिनेगरी काम हुने उनले बताए ।