सुनकोशी गाउँपालिका चैनपुरमा तीनवटा यातायात ठोकिदा १० जना घाइते

गाउँले न्युज, २६ असार, काठमाण्डौ । बर्दिबास बीपी राजमार्गअन्तर्गत सिन्धुलीको सुनकोशी गाउँपालिका चैनपुरमा बुधबार बिहान तीनवटा यातायातका साधन ठोक्किदा १० जना घाइते भएका छन् । घाइतेमध्ये तीनजनाको अवस्था गम्भीर रहेको प्रहरीले जनाएको छ ।
जिल्ला प्रहरी कार्यालय सिन्धुलीका अनुसार बुधबार बिहान काठमाडौंबाट सिन्धुलीतर्फ जादै गरेको बा ५ ख २२९८ नम्बरको हायस र बा १४ च ८५१८ नम्बरको कार ठक्‍कर खाँदा कार र हायस दुबैमा सवार १० यात्रु घाइते भएका हुन् ।

सिन्धुलीबाट काठमाडौंतर्फ आउँदै गरेको ना १ ज ६७९० नम्बरको सुमोलाई सोही दिशाबाट काठमाडौं जाँदै गरेको कारले ओभरटेक गर्दा हायससँग ठोक्किदा दुर्घटना भएको हो ।

सामान्य घाइतेको स्थानीय अस्पतालमा उपचार भइरहेको छ भने गम्भीरलाई काठमाडौं पठाइएको छ । दुबै गाडी चालकलाई प्रहरीले नियन्त्रणमा लिएको जिल्ला प्रहरी कार्यालय सिन्धुलीले जनाएको छ ।