प्रचण्ड नेतृत्वको सरकार असफल : गच्छदार

विराटनगर,माघ १४-

मधेसी जनअधिकार फोरम (लोकतान्त्रिक)का अध्यक्ष विजयकुमार गच्छदारले प्याकेजमा सहमति गर्दै निर्वाचनमा जानुको विकल्प नभएको बताएका छन् ।

विराटनगर एयरपोर्टमा शुक्रबार पत्रकारहरुसँग कुराकानी गर्दै गच्छदारले राजनीतिक गतिरोध अन्त्यका लागि संविधान संशोधन लगायतका विषयमा दलहरुबीच प्याकेजमा नै समाधान खोज्नु पर्ने बताएका हुन् । ‘संविधान कार्यान्वयनका लागि आफ्नो पार्टीले तीन वटै तहको निर्वाचनमा भाग लिने तयारीमा छ’, उनले भने, ‘संविधान कार्यान्वयनका लागि दलहरुबीच सहमति गरेर तीनवटै तहको निर्वाचन गर्नु अपरिहार्य छ ।’ उनले संविधान संशोधनमा दलहरुबीच सहमति नभए निर्वाचनमा जान नसकिने भएकोले पनि प्याकेजमा नै सहमति गरेर अगाडि बढ्नु पर्ने आवश्यक रहेको बताए ।

उनले संविधान संशोधनमा सहमति जुटाउन नसकेको प्रचण्ड नेतृत्वको सरकार अहिलेसम्म असफल रहेको बताए । उनले प्रचण्ड नेतृत्वको सरकारले हालसम्म कुनै ठोस उपलब्धि हासिल गर्न नसकेको तर तीनवटै तहको निर्वाचन गराएर संविधान कार्यान्वयन गराउन सके मात्रै सफल हुने बताए । उनले संविधान कार्यान्वयनमा भइरहेको ढिलाइको मुख्य जिम्मेवार ठूला दल रहेको आरोप लगाए ।