गाउँले न्यूज सम्बाददाता, ३ चैत्र, सिरहा । सरकारसँग ११ बुँदे समझदारीपछि मूलधारको राजनीतिमा प्रदेश गरेका डा. सीके राउत नेतृत्वको स्वतन्त्र मधेश गठबन्धनको राष्ट्रिय परिषदको बैठक सुरु भएको छ । पहिलो पटक सार्वजनिक स्थलमा कडा सुरक्षाबीच बैठक सुरु भएको हो ।
मधेशको २२ जिल्लाबाट २ सय प्रतिनिधि तथा पर्यवेक्षक बैठकमा सहभागि भएको गठबन्धनले जनाएको छ । बैठक स्थलमा गठबन्धनका नेताहरुलाई परिचयपत्रको रुपमा नागरिकता र आफ्नो मोबाईल बिना प्रवेश गराइएको थियो ।

सरकारसँग ११ बुँदे सहमतिपछि पहिलो पटक परिषदको बैठक बस्न लागेको र यस वैठकबाट गठबन्धनको आगामी राणनीति तय गर्न गम्भीररुपमा बहस चल्ने भएकाले मोबाइल निषेध गरिएको पनि गठबन्धनले जनाएको छ ।

सिरहाको लहान नगरपालिका वडा नम्बर ७ स्थित मारवाडी सेवा सदनमा आइतबार बिहान ११ बजेदेखि शुरु बैठकको सुरुवात नेपालको राष्ट्रिय गानबाट गरिएको थियो ।

राष्ट्रिय गान ‘सयौं थुङ्गा फूलका हामी..’ बजाइएपछि संयोजक डा. राउतले दीप प्रजल्वन गर्दै स्वं राममनोहर यादवको तस्विरमा माल्यार्पण गरेका थिए ।