‘पञ्चायत’को धमाधम डबिङ चल्दै

चितवन, माघ १३–

चलचित्र ‘पञ्चायत’को डबिङ अहिले धमाधम रुपमा चलिरहेको छ ।५० वर्ष पुरानो कथामा निर्माण भएको चलचित्र ‘पञ्चायत’को डबिङ सोचे भन्दा बढी समय लागेको निर्देशक शिवम् अधिकारीले जानकारी दिनुभयो । चलचित्रको डबिङमा बाग्लुङमा बोलिने पुरानो भाषाको कारणले कलाकारलाई चलचित्रमा आफ्नो भाषा मिलाउन समय लागेकाले चलचित्रको डबिङलाई सोचे भन्दा बढी समय लागेको अधिकारीले बताउनुभयो । ग्रामीण परिवेशमा खिचिएको यस चलचित्र निकै राम्रो बनेको कारणले पनि समय लगाएर नै काम गरेको सम्पादक बिपिन मल्लले बताउनुभयो ।

अर्को वर्ष रिलिज गरिने तयारीमा रहेको चलचित्र ‘पञ्चायत’मा संचारकर्मी रबि अधिकारी कार्यकारी निर्माता रहेका छन् । गणेश गिरीको प्रस्तुति रहेको यस चलचित्रमा सुशान्त श्रेष्ठ र शंकर सुवेदी निर्माताको रुपमा रहेका छन् । चलचित्रलाई अन्तराष्ट्रिय फेस्टिभलहरुमा सहभागी गराउने तयारी समेत गरिएको निर्माता सुशान्त श्रेष्ठले जानकारी दिनु भयो ।

चलचित्रमा सरोज खनाल र नीता ढुङगाना मुख्य भुमिकामा छन् । साथमा रुपा राना, गणेश गिरी,जाहन्वी बस्नेत, बिशाल पहाडि गिता अधिकारी, किरण थापा, राजुबाबु श्रेष्ठ लगायतको पनि अभिनय रहेको छ । चलचित्रमा रामेश्वर कार्कीको छायांकन, टंक बुढाथोकीको संगीत रहेको छ ।