सिमाना बचाऔं अभियान चितवन आईपुग्यो

चितवन, मंसिर १६–

राष्ट्रिय जनमोर्चा निकटको विद्यार्थी संगठन अखिल नेपाल राष्ट्रिय स्वतन्त्र विद्यार्थी युनियन (छैठौं)ले सीमा बचाऔं अभियान चितवन आईपुगेको छ । मंसिर १५ गते बुधबार नवलपरासीको सुस्ताबाट सुरु भएको सो अभियान मंसिर ३० गते इलामको मानेभञ्ज्याङमा गएर समापन हुने अखिल (छौंठौं)का केन्द्रीय अध्यक्ष विमल पोखरेलले जानकारी दिए ।
अभियान अन्तर्गत बिहीबार नारायणगढका चोकहरुमा कोणसभा सम्पनन भएको छ । बिहीबार नै टोली पर्सा जिल्लाको ठोरी पुगेर कार्यक्रम गर्ने विद्यार्थी नेता पोखरेलले बताए । नेपाल र भारतबीच सिमान जोडिएका २६ जिल्लामध्ये २३ जिल्लाका ७१ ठाउँमा सिमा विवाद भएको हुँदा संरक्षणका लागि जागरण अभियान चलाएको उनले बताए ।
अभियानका नेतृत्वकर्ता पोखरेलका अनुसार भारतले हालसम्म नेपालको ६१ हजार जमिन अतिक्रमण गरेको छ । जसमा सवैभन्दा धेरै पश्चिम महाकालीको कालापानीमा ३७ हजार हेक्टर र कपिलवस्तुको कृष्णनगरमा सवैभन्दा कम एक हेक्टर जमिन भारतीय पक्षले अतिक्रमण गरेको उनले बताए । सुस्तामा १४ हजार चार सय हेक्टर नेपाली भुमि अतिक्रमण भएको छ ।
‘सिमा अतिक्रमणको विषयलाई सत्तामा रहेको दलहरुले भारतसँग दह्रो रुपमा उठाउन सकेनन् । यस्तो अवस्थामा जनताले दिने दवाव नै प्रभावकारी हुने भएका कारण हामी सिमा क्षेत्रमा पुगेर जनतालाई गोलवन्द गर्न कस्सिएका हौं’ विद्यार्थी नेता विमल पोखरेलले भने ।