नयाँ शक्ति जिउँदो माछा, पुराना शक्तिहरु मरेको माछाः डा. भट्टराई

हेटौंडा, माघ २७–

नयाँ शक्ति पार्टी नेपालका संयोजक डा.बाबुराम भट्टराईले नयाँ शक्तिलाई जिउँदो माछा र पुराना पार्टीहरुलाई मरेको माछाको संज्ञा दिएका छन् ।
नयाँ शक्ति पार्टी, मकवानपुर जिल्ला प्रशिक्षण विभागको आयोजनामा हेटौंडामा भएको अभिमुखिकरण तथा प्रशिक्षण कार्यक्रममा बोल्दै संयोजक डा.भट्टराईले मरेको माछा बगेको पानीको बहाबसंगै बग्ने र जिउँदो माछा पानीको बहाबको बिपरीत भन्दै पुराना शक्तिहरु अरुले हिडेको सहज बाटो हिंडिरहेकोले उनिहरु मरेको माछा सरह भएको बताए । नयाँ शक्ति अरुले हिडेको भन्दा आफैले बनाएको पानीको बहाब भन्दा बिपरीत शाहसिक बाटो हिंडिरहेकोले नयाँ शक्ति जिउँदो माछा भएको डा. भट्टराईको जिकिर थियो ।
त्यस्तै पार्टीका सह–संयोजक रामचन्द्र झाले के.पी. ओलीले नेपाल भित्र मधेस नदेखेको र सिके राउतले मधेस भित्र नेपाल नदेखेकाले दुबै उस्तै अतिवादी भएको टिप्पणी गरे । कार्यक्रममा पार्टीका प्रदेश नं. ३ का संयोजक गंगा नारायण श्रेष्ठले घर–घरमा नयाँ शक्ति अभियान बारे जानकारी दिएका थिए । प्रदेश नं.३ का प्रशिक्षण विभाग संयोजक हरिराम रिमालले नयाँ शक्तिको दर्शन अग्रपन्थी फ्रन्टिस्ट भएको र नेपाल अहिले चीन÷भारतको तिब्र आर्थिक वृद्धिको साक्षी रहेको भन्दै आर्थिक समृद्धि र भौतिक बिकाशको लागि अहिले जस्तो उर्बर समय कहिलै नआउने बताए ।