सदस्यता वितरणलाई लिएर पत्रकार महासंघभित्र विवाद

admin

काठमाडौं, माघ २५ –

नयाँ सदस्यता वितरणको बिषयमा नेतृत्व अपारदर्शी भएको भन्दै नेपाल पत्रकार महासंघका केही केन्द्रीय सदस्यले आपत्ति जनाएका छन । तीन जना केन्द्रीय सदस्यले आज संयुक्त बिज्ञप्ति निकाल्दै जथाभावी सदस्यता वितरण गरिएको, सदस्यको सूची माग्दा नदिएको तथा केन्द्रीय समितिमा कुनै छलफल समेत नगरिएको भन्दै आपत्ति जनाएका हुन् ।

सदस्यहरु दीपेन्द्र कुँवर, रोशन पुरी र माधव दुलालले जारी गरेको विज्ञप्तिमा गैर पत्रकारले समेत महासंघको सदस्यता पाएको गुनासो बढीरहदा त्यसबारे केन्द्रीय सदस्यलाई नै जानकारी नदिइनु शंकास्पद भएको उल्लेख छ । नयाँ सदस्यको सूची केन्द्रीय समिति बैठकबाट पारित गरिनुपर्ने भएपनि त्यसो नगरी नियोजित रुपमा सोझै जिल्लामा पठाइएको विज्ञप्तिमा जनाइएको छ । उनीहरुले गैर पत्रकारलाई सदस्यता नदिन, श्रमजीवी पत्रकारलाई महासंघमा समेट्न तथा काम पारदर्शी ढङ्गले गर्न माग गरेका छन् ।