धुर्मुस सुन्तलीको प्रेरणाबाट मुसहरका ३५ बालबालिकाले आजदेखि पढ्न थाले
महोत्तरी, माघ १९ –
महोत्तरीको बर्दिबास–२ मुसहर बस्तीका ३५ जना बालबालिका श्रीपञ्चमीको अवसर पारेर एकैपटक विद्यालय जान थालेका छन् ।
मुसहर बस्तीमा नमुना एकीकृत बस्ती बनाइरहेका कलाकार सीताराम कट्टेल धुर्मुस र कुञ्जना घिमिरे सुन्तलीको प्रेरणा बस्तीका ३५ जना बालबालिकालाई अभिभावकले एकै साथ बुधबारदेखि अक्षराम्भ तथा पढाउन सुरु गरका हुन् । धुर्मुस सुन्तलीको प्रेरणाबाट मुसहरले पछिल्लो समय आफ्ना सन्तानलाई स्कुल पठाउन थालेको बस्तीका मञ्जय सादा मुसहरले बताउनुभयो ।
माघ शुक्ल पञ्चमीका दिन मनाइने ‘श्रीपञ्चमी’ पर्व बुधबार विद्याकी अधिष्ठात्री देवी सरस्वतीको प्रतिमा राखेर स्थानीयहरुले निष्ठापूर्वक पूजा–आराधना गरी छोराछोरीहरुलाई पढाउन सुरु गरेका हुन् । मुसहर बस्तीमा जिल्ला शिक्षा कार्यालयले बिहानी कक्षाको व्यवस्था गरेको छ ।
