सिद्धि विनायकमा तीन दिने खेलकुद कार्यक्रम शुरु

चितवन, माघ १२–

पूर्वी चितवनको कालिका नगरपालिका–७, खोलेसिमल बजारमा रहेको सिद्धि विनायक आवासीय मा.वि. मा आज (बुधबार)बाट ३ दिने खेलकुद कार्यक्रम शुरु भएको छ ।
सो कार्यक्रमको विद्यालयका प्राचार्य विष्णुमणी लामिछाने र निर्देशक लिलाबहादुर गुरुङ्गले संयुक्त रुपमा उद्घाटन गरे । “स्वस्थ शरीर र स्वस्थ दिमागको लागि खेलकुद” भन्ने मुल नाराका साथ शुरु भएको खेलकुद कार्यक्रममा विद्यालयका नर्सरीदेखि कक्षा १० सम्मका विद्यार्थीहरुको सहभागीता रहेको छ । ३ दिने खेलकुद कार्यक्रममा विद्यार्थीहरुलाई भलिबल, फुटबल, बास्केटबल, दौड, रिले दौड, म्युजिकल चेयर, गणित दौड, हाईजम्प, लङ्गजम्प लगायतका खेल खेलाइने विद्यालयका अतिरिक्त क्रियाकलाप प्रमुख भुबहादुर गुरुङ्गले जानकारी दिए । हरेक वर्ष जस्तै यस वर्ष पनि विद्यालयद्वारा आयोजना गरिएको खेलकुद कार्यक्रममा विजयी विद्यार्थीहरुलाई नगद, प्रमाणपत्र र दोसल्लाले सम्मान गरिने गुरुङ्गले जानकारी दिए ।
विद्यालयमा आज आयोजित उद्घाटन कार्यक्रममा विद्यालयका प्राचार्य विष्णुमणी लामिछाने, निर्देशक लिलाबहादुर गुरुङ्ग, सहायक प्राचार्य नवराज बञ्जारा, अतिरिक्त क्रियाकलाप प्रमुख भुबहादुर गुरुङ्ग लगायतले मन्तव्य व्यक्त गरेका थिए ।