चितवन, माघ ७–

एकपछि अर्को गर्दै नेपाली किशोरी तेरिया फौजा मगरले भारतीय सिनियर डान्स स्टारबीचको ठूलो प्रतिस्पर्धा ‘झलक दिखला जा’ को रियालीटी शो को उपाधि जितेकी छिन् ।
रुपन्देही रुद्रपुरकी १४ वर्षे तेरियाले भारतीय टिभी कलर्सको ‘झलक दिखला जा’ को रियालीटी शो को उपाधि जितेकी हुन् । फाइनलमा नृत्यसंगै एसएमएस भोटद्धारा उनी विजेता छानिएको हो । एसएमएसमा सबै प्रतिस्पर्धीलाई पछि पार्दै उनी ट्रफीको हकदार बनेकी हुन् । तेरियाको औपचारिक जीतको घोषणा भने शनिबार राति १० बजेपछि कलर्स टिभिमार्फत गरिनेछ । तर, शुक्रबार अपरान्ह नै एसएमएस भोटको नतिजा निस्केको र आयोजकले उपाधि जीतेको औपचारिक जानाकारी आफुलाई गराएको मुम्मईमा रहेकी तेरियाले हजुरबुबा कृष्ण फौजामगरलाई फोनमार्फत जानाकारी दिएकी छिन् । तेरियालाई जिताउन ‘तेरिया जीताऔं अभियान’ चलाइएको थियो ।
डान्स प्रतियोगिता विजेताहरु बीच प्रतिस्पर्धा गराउने ‘झलक दिखला जा’ भारतीय टिभी शोमा सर्वाधिक पुरस्कार राशीको हो । जीतसंगै तेरियाले ३० लाख भारतीय रुपैयाँ र रेनाल्ड डस्टर ब्राण्डको कार उपहार पाउने छिन् । सन् २०१४ को जी टिभिको ‘डिआइडीमा’ ४० हजार प्रतिस्पर्धीलाई पछाडि पारेकी तेरिया डिआइडी विजेताको तर्फबाट यसमा प्रवेश पाएकी हुन् । गत जुलाईमा प्रतियोगिता सुरु भएको थियो ।