दिपेन्द्र अधिकारी,
चितवन, माघ ७–

भूकम्पका कारण भत्किएको घरको लगत संकलनका लागि ढिलै भए पनि इन्जिनियरहरु गाउँमा पुगेपछि चितवनका पहाडी गाविसका भूकम्प प्रभावितहरु खुसी भएका छन् ।
भूकम्पका कारण चितवनको अति प्रभावित क्षेत्र पहाडी गाविसमा माघ ५ गतेबाट इन्जिनियरहरु भत्किएको घरको लगत संकलनमा जुटेको लगत सङ्कलन कार्यालय चितवनका प्रमुख जीवनाथ आचार्यले जानकारी दिए ।
चितवनमा भूकम्पबाट अति नै प्रभावित मानिएको दारेचोक गाविसस्थित स्वारथोकका स्थानीय कृष्णबहादुर गुरूङले ढिलै भए पनि इन्जिनियरहरु गाउँमा आएकोमा खुसी व्यक्त गरे । दारेचोक, चण्डीभन्ज्याङ, कोराक, काउले र लोथरमा इन्जिनियर र सामाजिक परिचालक खटिएका छन् आजको चितवन पोष्ट दैनिकमा खबर छ । आचार्यका अनुसार बाँकी रहेका नगरपलिका र गाविसमा अर्को हप्ताबाट लगत संकलन थालिने भएको छ । यसका लागि थप २६ जना इन्जिनियर खटिने भएका छन् । उनीहरुको साथमा सामाजिक परिचालकसमेत रहने छन् ।
चितवनमा कुल ५२ जना इन्जिनियरले काम थालेको ४५ दिन भित्र सबै विवरण तयार पारिसक्नुपर्ने हुन्छ । लामो समयसम्म लगत संकलन नहुँदा कतिपयले नयाँ घर बनाइ सकेका छन् । ‘राज्यले कतै हामीलाई भुल्ने हो कि जस्तो लागेको थियो, दारेचोक ७ कमेरेका स्थानीय नारायण भट्टराईले भने, ‘ढिलै भए पनि गाउँमा इन्जिनियर आउँदा अब भने केही हुन्छ कि भन्ने आशा जागेको छ ।’
भूकम्पमा परी तत्कालीन समयमा चितवनमा १० जनको मृत्यु हुनाका साथै १४६ जना घाइते भएको तथ्याङ्क छ । जिल्ला विकास समिति चितवनका अनुसार १८ हजार ७५२ वटा घरमा क्षतिको निवेदन परेका छन् ।
पुस २० गतेबाट इन्जिनियरहरु भूकम्प प्राभावितहरुको तथ्याङ्क संकलनका लागि गाउँगाउँ जाने भनिए पनि झण्डै २ हप्ता ढिला गरी उनीहरु गाउँ पुगेका हुन् ।