किसान जैविक विषादीतर्फ आकर्षित

कैलाली, मंसिर ३० –

अधिकांश किसान पछिल्लो समय रासायनिक विषादी प्रयोग गर्न छोडेर जैविक विषादी प्रयोग गर्न थालेका छन् ।

सुरु सुरुमा जनचेतना नहँुदा रासायनिक विषादी प्रयोग गर्ने किसान पछिल्लो समय भने जैविक विषादीको फाइदाबारे थाहा पाएपछि त्यसतर्फ आकर्षित हुन थालेका छन् । रासायनिक विषादी प्रयोग गरी उत्पादन गरिएको तरकारी प्रयोग गर्दा विभिन्न रोगको सङ्क्रमण हुने भएकाले जैविक विषादी प्रयोग गर्न थालेको धनगढी जाइका कृषक छेदुलाल चौधरी बताउनुहुन्छ ।

“रासायनिक विषादी प्रयोग गरेर उत्पादन गरेको तरकारी स्वास्थ्यका लागि हानिकारक हुने जानकारी पाएपछि जैविक विषादी प्रयोग गर्न थालेको छु,” अर्का किसान रामलाल चौधरीले भन्नुभयो ।

जिल्ला कृषि विकास कार्यालयका कार्यालय प्रमुख युवराज पाण्डेले अन्य जिल्लाको तुलनामा कैलालीमा रासायनिक विषादी प्रयोग गर्नेको सङ्ख्या न्यून रहेको बताउनुभयो । घातक विषादीको न्यूनीकरणका लागि विभिन्न किसिमका चेतनामूलक कार्यक्रम सञ्चालन गर्दै आएको उहाँको भनाइ छ । – रासस