संविधान दिवसका अवसरमा सोलुखुम्बका २ कैदबन्दीको कैद मिनाहा
सोलुखुम्बु । संविधान दिवसका अवसरमा सोलुखुम्बु कारागारबाट २ कैदबन्दीको कैद मिनाहा भएको छ ।विभिन्न अपराध मुुद्दामा कैद भुक्तान गरिरहेका उनीहरूले राष्ट्रपति विद्यादेवी भण्डारीबाट बाँकी कैद मिनाहा पाएका हुन् । ५० प्रतिशत कैद सजाय भुक्तान गरिसकेका र असल चालचलन भएका कैदीबन्दीको बाँकी कैद सजाय मिनाहा गरी रिहा गर्ने सरकारी नियमअनुसार संविधान दिवसका अवसरमा २ जनाको कैद मिनाहा भएको हो ।
कैद मुक्त हुनेमा कर्तव्य ज्यान मुद्धाका खुम्बु पासाङ ल्हामु गाउँपालिका १ का ३६ वर्षीय आङ देण्डी शेर्पा भनिने ल्हाक्पा देण्डी शेर्पा र हातहतियार खरखजना मुद्धाका माप्यदुधकोशी गाउँपालिका ७ का २४ वर्षीय गंगा बहादु आले मगर रहेका कारागार प्रमुख प्रशान्त कुमार महत्तोले जानकारी दिनुभयो । उहाँका अनुसार कारागार कार्यालयले आममाफीका लागि सिफारिस गरेको २ जनामध्ये दुवै जनाले आममाफी पाएका हुन ।
