काठमाडौं । द भ्वाइस अफ नेपाल हिमालय टेलिभिजनको गायन रियालिटी शो चौथो सिजनको औपचारिक घोषणा भएको छ । आगामी महिनादेखि प्रसारण तयारी रहेको चौथो सिजनको कोचमा हेरफेर भएको छ । दुई जना नयाँ कोचको प्रवेश भएको छ भने दुई जनाले निरन्तरता पाएका छन् ।

तीन सिजनसम्म कोच रहेका वरिष्ठ गायक दीप श्रेष्ठले यो सिजनमा विश्राम लिएका छन् । प्रमोद खरेल र राजु लामाले कोचकै रुपमा निरन्तरता पाएका छन् । राजेशपायल राई र प्रविशा अधिकारी नयाँ कोचको रुपमा चौथो सिजनमा जोडिएका छन् ।

डिजिटल अडिसनमा सहभागी भएका ४१ हजार आवेदकमध्येबाट छानिएका १२० प्रतिभा ब्लाइन्ड अडिसनको तयारीमा जुटेका छन् । यसपटक विदेशमा बसोबास गर्ने नेपालीभाषीले पनि सहभागिता जनाएका छन् । भारत, थाइल्यान्ड, बर्मा, अस्ट्रेलिया र अमेरिकामा बसोबास गरिरहेका नेपालीभाषी प्रतिभाले पनि अडिसनमा भाग लिएको जनाइएको छ ।

हिमालय टीभीका अध्यक्ष धर्मराज भुसालले एक महिनामै प्रसारण हुने गरी कार्यक्रम निर्माण अगाडि बढ्ने बताए । ब्लाइन्ड अडिसनमा प्रस्तुति दिनेमध्ये ६४ जना प्रतिभाले ब्याटल राउन्डमा प्रतिस्पर्धाको मौका पाउने निर्देशक लक्ष्मण पौडेलले बताए ।

चौथो सिजन हिमालय टीभीमा शुक्रबार र शनिबार राति ८ बजे प्रसारण हुनेछ ।