कविता- “शिक्षामा मातृभाषाको महत्व”
युरिका सिङ्जाली मगरको कविता
किन हराउदैछन् कुन्नी
मातृभाषाहरु आज ?
सयाद शिक्षामा सहजै स्थान नपाउनाले ।
यदि नेपाली भाषा सरह प्रथामिकता पाउने हो भने
बालअधिकारको सम्मान हुनेछ
मातृभाषाको शिक्षा पाउनाले ।
किन रुन्छन् विद्यार्थीहरु कुन्नी
विद्यालयमा आज ?
शिक्षाको एकभाषिक नीति र विधि नबुझ्नाले ।
यदि नेपाली भाषा सरह प्रथामिकता पाउने हो भने
विद्यार्थीको संज्ञानात्मक विकासमा मद्दत पुग्छ
मातृभाषाको शिक्षा पाउनाले ।
किन छोड्छन् विद्यार्थीले कुन्नी
बिचैमा आज ?
शिक्षामा आफ्नो मातृभाषा पढाइ नहुनाले
यदि नेपाली भाषा सरह प्रथामिकता पाउने हो भने
विद्यार्थीको छोड्ने दर कम हुनेछ
मातृभाषाको शिक्षा पाउनाले
किन हो छोड्नेले छोडिसके, कमजोर छ कुन्नी
नछोड्नेहरु आज ?
मातृभाषा नपढी अर्को भाषामा पढ्ने बाध्यताले
यदि नेपाली भाषा सरह प्रथामिकता पाउने हो भने
विद्यार्थीको शैक्षिक उपलब्धि बढ्न सक्छ
मातृभाषाको शिक्षा पाउनाले ।
किन कमजोर छ कुन्नी
समग्रमा शिक्षाको स्थिति आज ?
मातृभाषाको नियम लागु नगर्नाले ।
यदि नेपाली भाषा सरह प्रथामिकता पाउने हो भने
राष्ट्रिय एकतामा बल पुग्नेछ
मातृभाषाको शिक्षा पाउनाले ।
***
कवि युरिका सिङ्जाली मगर भाषाविज्ञानका स्नातकोत्तर हुन् । कवि तथा भाषिक अभियन्ता उनी मगर ढुट भाषाका मातृभाषी हुन् । कवि मगरसँग सामाजिक संजालमा जोडिन यहाँ क्लिक गर्नुहोस् ।
