हुम्ला दार्मका किसानहरु फलफुल नर्सरीबाट कमाउँछन् लाखौ रकम

कचहरी डट कम, हुम्ला ।। हुम्लाको दार्म क्षेत्रका किसानहरु विभिन्न प्रकारका फलफुलका नर्सरीबाट वर्षेनी लाखौं रकम आम्दानी गर्दै आएका छन् ।

जिल्लाभित्र र बाहिर कृषि विकास कार्यालय र विभिन्न गैससहरुले फलफुल खेतीका लागि विभिन्न कार्यक्रमहरु लागु गर्दा किसानहरु लाभान्वित भएका छन् ।

हुम्लाको दार्म क्षेत्रमा स्थापना भएको बागबानी फार्म सकारकारको उदासिनताको कारण बाँझो बन्दै गएको अवस्थामा त्यस वरपरका गाउँहरुका किसानहरुमा नर्सरी व्यवसाय फस्टाउँदै गएको छ । यो क्षेत्रमा स्थापना गरिएका करीब दुई दर्जन नर्सरीहरुले वर्षेनी ३० हजार जति बिरुवाहरु बेच्ने गरेको दार्म गर्खा गाउँका नर्सरीधनी चन्द्र शाहीले बताए । उनी वर्षको करीब १० हजार बिरुवा बेच्ने गर्छन् । यसबाट उनले ३ लाखदेखि ७ लाखसम्म कमाउने गरेका छन् । यो वर्ष यो क्षेत्रमा करीब २५ लाख बराबरको बिरुवा बिक्री भएको छ ।

प्रति बोट १५ रुपैंयादेखि ४५ रुपैंयासम्म बेच्ने गरिएको जानकारी प्राप्त भएको छ । यहाँका बिरुवाहरु हुम्ला, मुगु, जुम्ला, बाजुरा, कालीकोटसम्म पुग्ने गरेको छ । तर पनि सरकारीस्तरबाट यी किसानहरुलका लागि चाहिने आवश्यक सामाग्री, औजार, बिमा तथा अन्य सुविधाहरुमा ध्यान दिनु आवशयक रहेको किसानहरुको गुनासो रहेको छ ।