चितवन, फागुन ६–

निकै कष्टका साथ माध्यमिक विद्यालय चलाइदै आएको चितवनको सीमा क्षेत्र धादिङको जोगीमारास्थित श्री राष्ट्रि मावि खोरभञ्ज्याङमा प्लस टु कक्षा सञ्चालन गर्न धनधान्याचल गरिदैछ ।
२०१५ सालमा स्थापना भएको विद्यालयले स्थापनाको ५८ वर्ष पूरा गरिसक्यो । २०६५ सालदेखि चन्दा र सहयोगको भरमा मावि तह सञ्चालन गरिदै आएपनि अहिलेसम्म एउटै सरकारी दरवन्दी पनि पाएको छैन । निजी स्रोत शिक्षकका भरमा चलाइएको माविमा फेरि सहयोग नै जुटाएर प्लस टु चलाउने जमर्को गरिदै छ ।
आगामी फागुन १६ गतेदेखि श्रीमद्भागवत सप्ताह ज्ञान महायज्ञ सञ्चालन गर्न लागिएको विद्यालय व्यवस्थापन समिति अध्यक्ष आनन्द अधिकारीले जानकारी दिए । फागुन २४ गतेसम्म चल्ने यज्ञमा ख्यातिप्राप्त वाचक बालतपसी पण्डित उत्तम भट्टजी महाराजले कथा वाचन गर्नेछन् ।
९ दिनसम्मको महायज्ञबाट प्लस टु सञ्चालनका लागि आवश्यक आर्थिक सहयोग जुट्ने अपेक्षा गरिएको अधिकारीले बताए । त्यस क्षेत्र चितवनको सीमा जोडिएको क्षेत्र हो । त्यहाँ प्लस टु खोल्न सकिए चितवनको पहाडी गाविस काउलेबाट १० कक्षा सकेका विद्यार्थी पनि उच्च शिक्षाका लागि जान सक्नेछन् । “हाम्रै विद्यालयबाट वर्षमा कम्तीमा ३० जना विद्यार्थी १० उत्तीर्ण गर्छन्”, विद्यालयका प्रधानाध्यापक बासुदेव मरहठ्ठाले भने, “काउलेका दुई माविबाट पनि यहीं आउन सक्नेछन् । त्यसो गर्दा हाम्रो स्कूलले ६०–७० जनासम्म विद्यार्थीलाई शिक्षा सेवा दिन सक्छ ।” अहिले त्यस क्षेत्रका विद्यार्थीले दश कक्षा उत्तीर्ण गरेपछि घरै छोडेर अन्यत्र गई पढ्नुपर्ने बाध्यता छ । तर, ६० प्रतिशतभन्दा बढी चेपाङ विद्यार्थी अध्ययन गर्ने सो विद्यालयबाट दश कक्षा उत्तीर्ण गर्नेहरु अधिकांशसँग घर छोडेर पढ्न जाने आर्थिक हैसियत छैन ।
“दश कक्षापछि पढ्ने अवसर सबैले पाउन्नन्”, विद्यालयमा कार्यरत शिक्षक दिपक रिजालले भने, “त्यही भएर यहीं प्लस टु चलाउन अति आवश्यक छ ।” १६ गतेदेखि महायज्ञ सुरु गर्न अहिले शिक्षक, विद्यार्थी तथा गाउँले सबै एकढिक्का भएर लागेका छन् । उनीहरुले पूर्वविद्यार्थी तथा समाजसेवीहरुलाई भेट्ने र निम्ता गर्ने कार्यक्रम तीव्र बनाएका छन् । विद्यालयमा १५ हजार रुपैयाँभन्दा बढी सहयोग गर्नेको नाम शिलालेखमा लेख्ने तयारी विद्यालयले गरेको छ । त्यस्तै २५ हजार १ देखि ५० हजारसम्म दिनेलाई पञ्चेबाजासहित सम्मान गरिने र ५० हजार भन्दा बढी सहयोग गर्नेलाई विशेष सम्मान गर्ने अध्यक्ष अधिकारीले जानकारी दिए ।
पृथ्वी राजमार्गमा पर्ने धादिङ जोगीमाराको हुग्दीखोलाबाट दक्षिणतर्फ उकालो चढेर डेढ घण्टामा खोरभञ्ज्याङ पुग्न सकिन्छ । चितवनको प्रसिद्ध पर्यटकीय क्षेत्र हात्तीबाङ र सिराईचुली जाने मुख्य मार्गमै खोरभञ्ज्याङ पर्छ । २०१५ मा स्थापना भएका कमै विद्यालयको सूचीमा यो पनि पर्छ । तर, सुविधाको हिसाबले निकै पछि परेको छ ।