दारेचोकमा बन्यो चेरेस–लामीडाँडा कृषि सडक
हिरालाल गुरुङ,
चितवन, माघ २५–
चितवनको पहाडी गाविस दारेचोकको चेरेस–लामीडाँडा कृषि सडकको निर्माण कार्य सम्पन्न भएको छ । एमाले चितवन जिल्लाका अध्यक्ष एवंम् क्षेत्र न. ३ का सांसद कृष्णभक्त पोखरेलले उद्घाटन गर्नुभएको हो ।
दारेचोक–३ चेरेसबाट वडा न. ३ कै लामीडाँडा सम्मको ६.८० किलो मिटर चेरेस लामीडाँडा कृषि सडक ३३ लाख ४४ हजार ६ सय ५ रुपैयाँमा निर्माण सम्पन्न भएको हो ।
सांसद कोषबाट २४ लाख ५० हजार, गाविसबाट ५ लाख, गाउँ चन्दाबाट १ लाख २७ हजार २ सय १३ र २ लाख रुपैयाँ ऋणगरि सडक निर्माण कार्य सम्पन्न गरिएको सडक निर्माण समितिका अध्यक्ष मुन्द्रबहादुर मगरले जानकारी दिनुभयो ।
कार्यक्रममा बोल्दै सांसद पोखरेलले विकासको पहिलो चरण नै सडक र बिजुली भएको भन्दै यी क्षेत्रहरुमा बजेटको अभाव हुन नदिने प्रतिवद्धता जनाउनुभयो ।
कतिपय पहाडी इलाकामा बजेट परे पनि काम गर्न नसकेको भन्दै लामीडाँडाबासीलाई काम सम्पन्न गरि उदाहरणीय काम गरेको भन्दै धन्यवाद दिनुभयो ।
सांसद पोखरेलले दलहरुबीच साझा धारण बन्न नसक्दा विकासले गति लिन नसकेको बताउनुभयो ।
कार्यक्रममा बोल्दै माओवादी केन्द्रका केन्द्रिय सदस्य प्रताप गुरुङ मौसमले गाउँ परिषदमा बजेट विनियोजन गर्दा सबै क्षेत्रका प्रतिनिधहरुलाई समेट्दा गाउँको विकास छिटो हुने बताउनुभयो । सम्बन्धीत गाउँ वडाका प्रतिनिध परिषदमा सहभागी बन्न नपाउँदा गाउँको आवश्यकता पहिचान नहुने र हचुवाको भरमा बजेट विनियोजन हुँदा योजना सम्पन्न नहुने बताउनुभयो ।
कार्यक्रममा गाविस सचिव निलकण्ठ लामिछाने, एमाले जिल्ला सचिवालय सदस्य नारायाण अधिकारी, जिल्ला सदस्य जुनाराज भण्डारी मस्र्याङदी बहुउदेश्य सहकारी मुग्लिनका अध्यक्ष जयलाल श्रेष्ठ लगायतले मन्तव्य राख्नुभएको थियो ।
