काठमाडौं, माघ २३- 

स्थानीय निर्वाचन तयारीका लागि सरकारले पठाएको पत्रले निर्वाचन आयोग झन् अन्योलमा परेको छ । मन्त्रिपरिषद्को बिहीवार बसेको बैठकले स्थानीय तहको निर्वाचनका लागि आवश्यक तयारी गर्न आयोगलाई पत्र पठाउने निर्णय गरेको थियो ।

आयोगले आफ्नो तर्फबाट सधैं निर्वाचन सम्बन्धी काम गरिरहेकै हुने भन्दै आयोगका सचिव गोपीप्रसाद मैनालीले मिति घोषणा नगरी ‘आवश्यक तयारी गर्नू’ भनी आएको पत्रमा केही अस्पष्टता रहेको लोकान्तरलाई बताए । सरकारले निर्वाचन गर्ने भनी प्रतिबद्धता जनाएपनि निर्वाचनका सम्बन्धमा आयोगलाई पठाइएको पत्रले काम गर्ने सन्दर्भमा आयोगलाई केही अस्पष्ट बनाएको उनको भनाइ छ ।