श्रीलंकन गायक इराजसँग कमलले गाए गीत (भिडियोसहित)

काठमाडौं,माघ १६ –

पप गायक कमल खत्रीले श्रीलंकन गायक इराज सँग गीत गाएका छन् । विभिन्न देशका गायकसँग गीत गाउँदै आएका इराजले कमलसँग पनि गीत गाएका हुन् ।

“इराजकै कम्पोजिशनमा मैले गीत गाएको हुँ,” कमलले भने, “उहाँले ट्रयाक पठाइदिनु भएको थियो । त्यही मेलोडीमा गीत गाएको हुँ ।” इराजले अमेरिकन तथा अफ्रिकन मुलका विभिन्न देशका कलाकारसँग गीत गाउँदै आएका छन् ।

कमलले नेपाली भाषामै गीत गाएका हुन् । यो गीत श्रीलंकन भाषामा पनि छ ।

नेपालमै खिचिएको भिडियोलाई थप परिमार्जन गरेर इराजले नै भिडियो पनि तयार पारेका छन् । ुआशावारीु बोलको गीतको भिडियोमा कमल पनि देखिन्छन् ।

इराजको संगीत रहेको गीतमा शब्द कमल खत्री र हिमांसु रायमाझीको हो । भिडियो निर्देशन प्रियांगा रनसिंगेले गरेका छन् ।

“नेपाली संगीतलाई अन्तर्राष्टियकरण गर्ने यो एउटा अवसर पनि हो,” कमल भन्छन्, “यसैगरी विभिन्न भाषा र विभिन्न देशका कलाकारमार्फत हामी नेपाली संगीतलाई विश्व सामु लैजान सक्छौं ।”