विपन्न विद्यार्थीहरुलाई स्टेशनरी सहयोग

चितवन, माघ १४–

पूर्वी चितवनको कालिका नगरपालिका–६, खोलेसिमल बजारमा रहेको लायन्स क्लब अफ चितवन कालिकाले एक कार्यक्रमकाबीच आज विपन्न विद्यार्थीलाई स्टेशनरी सामाग्री सहयोग गरेको छ ।
सोही स्थानमा रहेको निम्न माध्यामिक विद्यालय, रेडक्रसग्राममा अध्ययनरत नर्सरीदेखि कक्षा ५ सम्मका विद्यार्थीलाई स्टेशनरी वितरण गरिएको थियो । क्लबद्वारा आयोजित कार्यक्रमका प्रमुख अतिथि लायन्स क्लब इन्टरनेशनल ३२५ बी२ का डिष्ट्रिक गर्भनर घनश्याम भट्टराई र विशिष्ट अतिथि चितवनका जिल्ला शिक्षा समितिका अध्यक्ष एवं स्थानीय विकास अधिकारी श्रवण कुमार पोखरेलले सो विद्यालयको कक्षा १ माअध्ययनरत छात्रा फूलमाया तामाङ स्टेशनरी प्रदान गरी कार्यक्रमको उद्घाटन गरेका थिए ।

स्थानीय चेपाङ, आदिवासी, दलित, जनजाति लगायतका विपन्न वर्गका विद्यार्थी अध्ययनरत सो विद्यालयका १ सय १० जना विद्यार्थीलाई स्टेशनरी वितरण गरिएको थियो । कार्यक्रम क्लबका अध्यक्ष विनोद रेग्मीको अध्यक्षतामा भएको थियो भने कार्यक्रम संयोजक चेतप्रसाद अधिकारीले स्वागत मन्तव्य व्यक्त गरेका थिए ।