चितवन, पुस २७–

११ औँ चितवन महोत्सव २०७३ मा दर्शकको उल्लेख्य सहभागिता रहेको छ । महोत्सव अवलोकनका लागि बुधबार तेस्रो महोत्सव स्थल नारायणी नदी किनारको प्रदर्शनी मैदानमा हजारौँ दर्शकहरुको उपस्थिति रहेको आयोजक उद्योग वाणिज्य संघ चितवनले जनाएको छ ।

बुधबार विशेष गरि दर्शकहरुको उपस्थिति सांगीतिक प्रस्तुती, केराको परिसर, च्याउको मःम भएको ठाउँमा बढी देखिन्थ्यो । उद्योग वाणिज्य संघ चितवन, भरतपुर उपमहानगरपालिका र जिल्ला विकास समिति चितवनको आयोजना रहेको महोत्सवमा अटो, रेष्टुरेन्ट, सूचना र प्रविधि सहितका पाँच सय वटा स्टलहरु रहेका छन् । त्यसैगरि सिमान्तकृत जातिका सात वटा विशेष स्टलहरुमा उनीहरुको भेषभूष, कला र संस्कृति सहितको स्टल राखिएका छन् । पुस २५ गतेदेखि सुरु भएको महोत्सव माघ ५ गतेसम्म सञ्चालन हुनेछ भने महोत्सव अवधीभरी विभिन्न गोष्ठी तथा खेलकुद प्रतियोगिता समेत आयोजना गरिएको महोत्सव मूल समारोह समितिका संयोजक एवम् उद्योग वाणिज्य संघ चितवनका अध्यक्ष राजन गौतमले जानकारी दिए ।

महोत्सव अन्तर्गत पुस २८ गते बिहीबार महोत्सव स्थलमा फाइभ ए साइड बीच फुटबल प्रतियोगिताको आयोजना हुँदैछ । महोत्सवको खेलकुद समितिका संयोजक प्रशान्त कुमार पियाका अनुसार चितवन जिल्लाका विभिन्न १० वटा टिम सहभागी रहेको उक्त फुटबल प्रतियोगिताको फाइलन खेल पुस २९ गते शुक्रबार हुँदैछ । प्रत्येक समूहमा पाँच पाँच जना रहेर खेलिने फुटबलमा नारायणगढ फुटबल क्लब, बसन्त युनाइटेड क्लबसहितका १० वटा समूहहरु प्रतिष्पर्धा गर्ने संयोजक पियाले बताए । प्रतियोगिताको विजेताले २० हजार रुपैयाँ नगद सहित ट्रफी, मेडल र प्रमाणपत्र पाउनेछन् भने उपविजेताले १० हजार रुपैयाँ सहित ट्रफी, मेडल र प्रमाणपत्रमा चित्त बुझाउनुपर्ने पियाले जानकारी दिए ।