गोरु जुधाउन दलीय भागबण्डामा समिति गठन
नुवाकोट,पुस ९-
नुवाकोटको तारुकामा माघे सङ्क्रान्तिमा गोरु जुधाउनका लागि दलीय भागबण्डामा ‘गोरु जुधाई मेला व्यवस्थापन समिति’ गठन गरिएको छ । कांग्रेस, एमाले र माओवादी केन्द्रबीच भागबण्डाका आधारमा समिति गठन गरिएको छ । तारुकामा भएको भेलाले दीपेश शाक्यको अध्यक्षतामा नौ सदस्यीय गोरु जुधाइ मेला व्यवस्थापन समिति गठन भएको हो । शाक्य कांग्रेस गाउँपार्टीका सचिव हुन् ।
सचिवमा साधुराम सिग्देल र कोषाध्यक्षमा बद्री ढुङ्गाना तथा सदस्यमा राज्यलक्ष्मी श्रेष्ठ, माधव बखरेल, श्याम अछामी, सङ्गीता शाही, कृष्ण तामाङ र शर्मिला सिग्देल रहेका छन् । एकाधबाहेक उनीहरु दलीय प्रतिनिधि हुन् ।
भेलाले जनकराज ढुङ्गानाको संयोजकत्वमा सल्लाहकार समिति समेत गठन गरेको छ । ढुंगाना माओवादी केन्द्र निकटका हुन् ।समितिले अब चाँडै गोरु दर्ताका लागि सूचना जारी गर्ने छ ।
तारुका गाविसको चन्दनीको ठूलो पाटामा हरेक वर्ष गोरु जुधाइँदै आएको छ । तारुका, बुधसिङ, रातमाटेलगायत क्षेत्रमा सयौँ वर्षअघिदेखि गोरु जुधाइँदै आएकामा २०६२ सालदेखि भने तारुकाले एकै स्थानमा माघे सङ्क्रान्ति पर्वका रुपमा व्यवस्थित रुपमा गोरु जुधाउँदै आएको छ ।
यसैबीच नुवाकोटकै बेत्रावतीमा पनि गोरु जुधाउने तयारी सुरु भएको छ । स्थानीय गोसाइँकुण्ड युवा क्लब मेलाको खर्च जुटाउन र प्रचारप्रसारमा जुटिसकेको क्लबका अध्यक्ष सुरज लबटले बताए ।
फाइल तस्बिर
