नवलपरासीमा सवारी दुर्घटना, २ को मृत्यु

नवलपरासी,पुस १-

नवलपरासीका दुई छुट्टाछुट्टै स्थानमा भएको सवारी दुर्घटनामा दुई जनाको ज्यान भएको छ ।नवलपरासीको गैंडाकोट ९ थुम्सीमा आज दिउँसो पश्चिमबाट पूर्वतर्फ जाँदै गरेको अनटेस्ट मोटरसाईकल र विपरित दिशाबाट आइरहेको ना २६ प ९२ ८७ नम्बरको स्कुटर आपसमा ठक्कर खाँदा गैंडाकोट १६ अमरापुरीका स्कुटर चालक वर्ष २१ का आशिषराज तिमिल्सिनाको ज्यान गएको हो ।

दुर्घटनामा मोटरसाइकल चालक नवलपरासीको देउराली ५ निवासी २६ वर्षीय हरिकृष्ण बोहोरा घाइते भएका छन् ।ईलाका प्रहरी कार्यालय गैंडाकोटमा प्रहरी निरीक्षक सुवास हमालका अनुसार घाइतेको चितवन भरतपुरमा उपचार भइरहेको छ ।

त्यस्तै नवलपरासीको दुम्किबास ५ दाउन्ने बजारमा भारतीय नम्बर प्लेटको पिकअपले भ्यानले मोटरसाइकललाई ठक्कर दिँदा नवलपरासी बर्दघाट ५ पालडाँडा निवासी २१ वर्षीय आशिष जिसीको घटनास्थलमै ज्यान गएको छ ।

जिल्ला प्रहरी कार्यालय नवलपरासीले दिएको जानकारीअनुसार पश्चिमबाट पूर्वतर्फ आउँदै गरेको युपी ६५ सीटी ३७१७ नम्बरको पिकअप भ्यान र बिपरीत दिशाबाट जाँदै गरेको लु १७ प ११७७ मोटरसाईकल ठक्कर खाँदा दुर्घटना भएको हो ।दुर्घटनामा बर्दघाट ५ सुखानीका बर्ष २० का जितेन्द्र चौधरी गम्भिर घाइते भएका छन् ।