अब केपी ओली नायक !

काठमाडौं, मंसिर २९–

प्रधानमन्त्रीकाल होस् या अन्य समय नेपाली जनतालाई हसाएरै दंग पारे एमाले अध्यक्ष केपी ओली । धेरैले नेता होइन कलाकारको संज्ञा दिए नेता ओलीलाई । अब नेपाली जनताले साच्चिकै ओलीलाई कलाकार देख्न सक्ने छन् ।
अध्यक्ष ओलीमाथी चलचित्र बन्ने भएपछि उनी नायकको रुपमा प्रस्तुत हुने निर्माण पक्षले जनाएको छ । ‘रातो सूर्य’ नाम राखिएको चलचित्रमा ओली आफैंले पनि नायकको भूमिका निर्वाह गर्ने भएका हुन् ।

दिपेन्द्र प्रसाद दाहालको निर्देशनमा बन्ने सो चलचित्रमा ओलीको बाल्यकालदेखि ६५ वर्षको अवधिलाई प्रस्तुत गरिने छ । निर्देशक दहालका अनुसार ओलीको १६ देखि ४५ वर्षको उमेरसम्मको भूमिका कलाकार अनुपम शर्माले निर्वाह गर्ने भएका छन् ।

४५ वर्षदेखि ६५ वर्षसम्मको भुमिकामा भने ओली आफैं देखिने भएका छन् । त्यसवाफत् ओलीलाई पारिश्रमिक समेत दिइने निर्देशक दाहालले जानकारी दिए ।

दाहाल र शर्माले बिगत पाँच वर्षदेखि ओलीको रहन सहन, लवजवारे अध्ययन गरेको जानकारी दिए ।

निर्देशक दाहालको भनाई अनुसार ओलीले १० दिन सुटिङ गर्नुपर्ने छ । उनको सबै सुटिङ काठमाडौंमै हुने छ । ‘१० दिन सुटिङको लागि ओलीसँग समय मागेको जानकारी दिँदै दाहालले ओलीले सकारात्मक प्रतिक्रिया दिएको बताए ।
आठराईबाट चलचित्रको सुटिङ सुरु हुने छ भने त्यसपछि झापा, रौतहट र मकवानपुरको थाहा नगरपालिकामा सुटिङ हुने छ । रुपचन्द्र विष्टसँग ओलीको संगत भएकाले थाह नगरपालिकामा अलि बढी सुटिङ हुने दाहालले बताए । जेल बस्दाको अवधिको दृष्य भने सेट लगाएर गर्ने योजना छ ।