सोलुखुम्बु । थुलुङ दुधकोशी गाउँपालिका ७ देसाले वडा प्रथम विद्यार्थी देखि विद्यालय सम्मलाई पुरस्कार तथा सम्मान सहित स्वास्थ्य बीमा गरेको छ ।

मंगलबार आयोजित कक्षा ११ का विद्यार्थी, अभिभावकको स्वास्थ्य बीमा तथा वडा स्तरीय परीक्षाको पुरस्कार वितरण कार्यक्रका बीच कक्षा तीनको वडा स्तरीय परीक्षामा वडा प्रथम हुने विद्यार्थी, शिक्षक, ब्यबस्थापन समिति र विद्यालयलाई पुरस्कार तथा सम्मान गर्दै ११ कक्षाका विद्यार्थी अभिभावकको स्वास्थ्य बीमा गरेको हो ।

देउसामा सञ्चालित विद्यालय मध्ये वडा प्रथम हुन सफल देउराली आधारभुत विद्यालयलाई गाउँपालिका अध्यक्ष असिम राईले सम्मानपत्र सहित ५० हजार पुरस्कार प्रदान गर्नुभएको वडा अध्यक्ष भोजराज कार्कीले जानकारी दिए ।

उहाँका अनुसार शैक्षिक सत्र २०८० मा देउराली आधारभुत विद्यालयले जम्मा १०० अंकमध्ये ७३.६६ अंक प्राप्त गरेको छ । यस्तै देउसा माध्यमिक विद्यालयले ६९.३३ अंक सहित वडा द्धितिय भएको छ भने ६९.३३ अंक सहित जालिम देवी आधारभुत विद्यालय चेराखु तृतीय भएको छ ।

गाउँपालिका शिक्षा शाखा प्रमुख गणेश गुरुधामीको संयोकत्वमा रहेको मुल्याङ्कन समितिले विद्यार्थी नियमितमा १० अंक, कक्षा कोठा ब्यबस्थापनमा २०, कक्षा तीनको वडा स्तरीय परीक्षामा विद्यार्थीले प्राप्त अंक ५०, दिवा खाजा ब्यबस्थापन ५, अभिभावकको उपस्थिति १० र शिक्षक उपस्थितिमा ५ अंकलाई आधार मानी अंक प्रदान गरेको थियो ।

शैक्षिक सत्र २०७९ मा वडा कार्यालयले लिएको वडा स्तरीय परीक्षामा देउसा माध्यमिक विद्यालयका आषिस राई प्रथम हुनुभएको छ भने भने २०८० मा सोही विद्यालयकी समिक्षा राई वडा प्रथम हुन सफल भएको वडा अध्यक्ष कार्कीले जानकारी दिनुभयो । उनीहरुलाई सम्मान पत्र सहित पुरस्कार प्रदान गरिएको छ ।

यस्तै देउसा माध्यमिक विद्यालयका शिक्षक कुलप्रसाद राई उत्कृष्ट शिक्षक २०७९ बन्दै प्रसंसापत्र सहित पुरस्कार प्राप्त गर्नुभएको छ ।वडा स्तरीय परीक्षामा सतप्रतिशत विद्यार्थी उत्तीर्ण हुने विषय शिक्षकलाई सम्मान गर्ने वडाको निर्णय अनुसार सम्मान गरिएको बताइएको छ ।

यस्तै नाम्से आधारभुत विद्यालय ब्यबस्थापन समिति उत्कृष्ट विद्यालय व्यबस्थापन समिति २०७९ बन्न सफल भएको छ । २०५१ सालमा विद्यालय स्थापना भएपनि २०७९ सालमा विद्यालयको नाउमा जग्गा रजिष्टेशन गराउन सफल भएको, भौतिक पुर्वाधारको क्षेत्रमा स्थानीय सरकारद्धारा बिनियोजित बजेटमा थप सक्रियताका साथ काम गरेको, गाउँपालिका र वडाबाट जारी शैक्षिक गुणस्तरका नीति निर्देशनलाई पुर्णरुपमा पालना गरी शैक्षिक ब्यबस्थापनमा महत्वपुर्ण भूमिका खेलेकाले उत्कृष्ट ब्यबस्थापन समिति घोषणा गरिएको वडा सचिव अशोक कुमार राईले बताए ।

आर्थिक वर्ष २०८१/०८२ मा वडा कार्यालयद्धारा बिनियोजित बजेटबाट देउसा माध्यमिक विद्यालय कक्षा ११ मा अध्ययनरत विद्यार्थी र उनीहरुको अभिभावकको स्वास्थ्य बीमा पनि मंगलबारनै गरिएको कार्यपालिका सदस्य समेत रहनुभएको वडा सदस्य सरिता राईले जानकारी दिनुभयो । उहाँका अनुसार कक्षा ११ मा अध्ययनरत ३० जना विद्यार्थीको परिवारको स्वास्थ्य बीमा गरिएको छ । उनीहरुले प्रति परिवार ५ जना सम्मको प्रति व्यक्ति एक लाखका दरले स्वास्थ्य उपचारमा छुट प्राप्त गर्नेछन् । विद्यार्थीलाई टिकाउन तथा नियमीत गराउने र उपचारमा सुविधा पुर्याउने उदेश्यले उक्त कार्यक्रम गरिएको बताइएको छ ।

कार्यक्रममा बोल्दै प्रमुख अतिथि तथा गाउँपालिका अध्यक्ष असिम राईले सामाजिक विकासमा सृजनशिता सहित उत्कृष्ट कार्य गर्न वडा नम्बर ७ सक्रिय रहेको भन्दै प्रशंसा गर्नुभयो । गाउँपालिकाले शिक्षालाई पहिलो प्राथमिकतामा राखेको भन्दै वडा नम्बर ७ मा भौतिक विकास संगै सामाजिक विकास पनि उत्तीकै प्रभावकारी ढंगले सञ्चालन भएको बताए । सामाजिक विकास बिनाको भौतिक विकासले सार्थकता नपाउने भन्दै उहाँले सबैलाई थुलुङ दुधकोशी सरकार त्यस तर्फ सचेत रहेको बताए ।

यस्तै वडा अध्यक्ष भोजराज कार्कीले आफ्नो सिंगो टिम गाउँको विकासमा लागि परेको र स्थानीय वडाबासीले समेत साथ दिएको भन्दै सबैलाई धन्यवाद ज्ञापन गर्नुभयो । एकता बिना गाउँको विकास संभवन नरहेको भन्दै उहाँले सकारात्मक सुझाव आवश्कय रहेको बताए ।