काठमाडौं । शुक्रवार साँझबाट वर्षा र हिमपात गराउने पश्चिमी वायु प्रणाली नेपाल भित्रिने भएको छ। यसको असर शनिवारसम्म रहने मौसम पूर्वानुमान महाशाखाले जनाएको छ ।

महाशाखाले विशेष बुलेटिन जारी गरी शुक्रवार साँझबाट भित्रिने पश्चिमी न्यूनचापीय प्रणालीका कारण सुदूरपश्चिम र कर्णाली प्रदेशका धेरै स्थान र लुम्बिनीका केही स्थानमा हल्कादेखि मध्यम वर्षा हुने बताएको छ।

त्यस्तै गण्डकी, बागमती, मधेस र कोशीका थोरै स्थानमा हलुका वर्षाको सम्भावना रहेको पनि विभागले जनाएको छ। महाशाखाका अनुसार शनिवारसम्म सुदूरपश्चिम र कर्णालीका उच्च पहाडी तथा हिमाली भूभागका अधिकांश स्थान तथा गण्डकी, वागमती र कोशीका उच्च पहाडी तथा हिमाली भूभागका केही स्थानमा हल्कादेखि मध्यम हिमपात हुने देखिन्छ ।

यो मौसम प्रणालीको असरले तापक्रम समेत घट्ने र चिसो बढ्ने भएकाले वृद्ध, वृद्धा, बालकाललिकालाई सचेत रहन पनि विभागले जनाएको छ ।