मैले बुझ्न नसकेको प्रेमको अर्थ,

नेपाली शब्दकोशको सुन्दर शब्द ‘प्रेम’

अक्षर गन्दा मात्र दुई अक्षर,

शब्दमा उसै तिमी एउटै प्रेम।

तर …..

अपरिभाषित र असीमित रुपका साथ

कसैलाई जीवन साथ त कसैलाई घात,

मैले बुझ्ने प्रयास गरिनँ या बुझ्न सकिनँ,

ठ्याक्कै आम मान्छेहरुले झै ।

मन मिलेसम्म सबै काम सकियो प्रेम,

न जात, न भात, न समाज, न इज्जत

बस हिसाब किताब गर्‍यो सकियो प्रेम,

कुन्नी खै कहाँ हिसाब बिग्रनु पुग्छ ।

अनि सुरु हुन्छ जात, भात, समाज

उसै उसै थपिन्छ धन, सम्पत्ति पनि

प्रेमभित्र लुकेका तिम्रा घृणित नजरहरुलाई

अनि पिपासु मन भित्रको आदतलाई

‘प्रेम; तिमी कहाँ कहाँ पुगेनौ होला ।

रुकुम, रोल्पामा एउटा केटा मारिन्छ, प्रेम

नुवाकोट, सिन्धुपाल्चोकमा नर्स मारिन्छे, प्रेम

मोरङ, झापामा हत्या हुन्छ, प्रेम

भोजपुरमा एउटीले खुकुरी प्रहार गर्छे प्रेम

यो त सब तिम्रो ‘ट्रेलर’ मात्र न हो ।

बाकी पुरै ‘फिल्म’ नै हेर्ने हो भने आज सकिन्न ।

अब भन यस्ता कति छन्  तिम्रा रुप

यकिन छैन तिम्रो रुपको गरेर वर्णन  ,

बोल्न सक्नेले बोल्यो, लड्न सक्नेले लड्यो ।

तसर्थ समाचारमा तिमी ‘हाइलाइट’ भयौं ।

तर सत्य के हो आज पनि थाहा भएन ।

‘प्रेम’ पवित्र शब्दको आडमा के हुँदै छ भनेर ।

त्यसो त अझै संसारमा जो त्यस्ता छन्

न बोल्न सक्छ, न लड्न नै

प्रत्येक सेकेन्ड जिउदो लास बन्दै छ।

उनिहरु न अखबारमा आउँछन्,

न प्रेम रोग कै कारण मर्दैछ भनेर पत्ता लाग्छ।

त्यसैले त म भन्छु-

तिमी संसारको सबै भन्दा खतरनाक ‘रोग’ हौं ।

तिम्रो नामको उपचार गराउन,

बिश्वमा ‘हस्पिटल’ बनेकै छैन ‘प्रेम’ ।

अनि छन् त छन् अमर पनि बनेका छन् ।

‘मुना-मदन’ र ‘रोमियो-जुलियट’ झै

इतिहासमा आफ्नो मृत्युलाई पनि जितेका छन्

दुख, सुख साटासाट गरेका छन्,

तिम्रो नाममा सम्झौंता गर्न सक्नेहरु मात्र ।

कसैको ज्यान लिन्छौं त कसैलाई बचाउछौं ।

भन कुन रोग र कुन ‘औषधी’ हौ तिमी  ?

अझै मैले बुझ्न सकिनँ ‘प्रेम’ तिमीलाई।

•••

हलेसी तुवाचुङ नगरपालिका -०७ हलेसी खोटाङ

विमला राई चाम्लिङलाई सामाजिक संजालमा भेट्न यहाँ क्लिक गर्नुहोस् ।