गाउँले न्युज, काठमाडौं । सोलुखुम्बुको थुलुङदूधकोशी गाउँपालिकामा निर्माणाधीन अवस्थामा रहेको दूधकोशी सामुदायिक अस्पताललाई सोही गाउँपालिकाको मुक्लीको मैदेल सेरोफेरो समाज काठमाडौंले १५ लाख रुपियाँ रकम हस्तान्तरण गरेको छ ।

जिल्लाको सबैभन्दा ठूलो गाउँपालिकाको केन्द्र मुक्लीमा गत वर्ष अस्पताल निमाणार्थ सञ्चालित महायज्ञमा समाजले गरेको प्रतिबद्धताअनुसार पहिलो किस्ता बापतको १५ लाख रुपियाँ रकम गाउँपालिका अध्यक्ष असिम राईलाई हस्तान्तरण गरिएको हो ।

पहिलो किस्ता बापतको रकम समाजका अध्यक्ष गणेशबहादुर गुरुङ र महासचिव गोविन्द गुरुङले संयुक्त रुपमा अध्यक्ष राईलाई हस्तान्तरण गरेको अध्यक्ष राई बताउनुभयो ।

थुलुङदूधकोशी गाउँपालिकाको केन्द्र मुक्लीमा सुविधा सम्पन्न ५० शैयाको अस्पताल निर्माणको काम तिव्र रुपमा अगाडी बढिरहेको अध्यक्ष राईको भनाइ छ । हजारौं दाताहरुले महायज्ञमा प्रतिवद्धता गरे अनुसारको अस्पताल निर्माणका लागि आर्थिक सहयोग क्रमशः प्राप्त भैरहेको बताइएको छ ।