काठमाण्डौ, २४ पौष । पूर्वाञ्चल साहित्य प्रतिष्ठान विराटनगरबाट प्रदान गरिने यस वर्षको सुदीश निरौला स्मृति साहित्य पुरस्कारबाट युवा समालोचक, अनुवादक, कवि, आख्यानकार महेश पौडेललाई पुरस्कृत गरिने भएको छ । पौडेलका विविध विधा र अनुवादका तीनदर्जन भन्दा बढी कृति प्रकाशित छन् ।

सुदीश निरौला ट्रस्टका तर्फबाट टेकमाया निरौला संस्थापक रहनु भएको उक्त पुरस्कारको राशि १५,००० पन्द्रह हजार र सम्मानपत्र रहेको छ । निरौलाको २०७२ सालमा सडक दुर्घटनामा परी निधन भएको थियो । इञ्जिनीयर निरौला साहित्यप्रति रुचि राख्नाका साथै कवितासमेत लेख्ने गर्थे । दिवंगत छोरा सुदीशका नाममा निरौला परिवारबाट यो पुरस्कार संस्थापन गरिएको हो । प्रतिष्ठानका अध्यक्ष प्राज्ञ विवश पोखरेलको अध्यक्षतामा सोमबार बसेको बैठकले यो निर्णय गरेको हो । यसै वर्षदेखि प्रदान गरिने यो पुरस्कार आगामी माघ ६ गते विराटनगरमा प्रदान गरिने छ।