काठमाडौं,फागुन ६ –

अन्तर्राष्ट्रिय बजारमा पेट्रोलियम पदार्थको मूल्य बढेपछि सरकार स्वामित्वको नेपाल आयल निगम लिमिटेड (एनओसी) को घाटा बढेको छ ।
यो महिनादेखि निगमको घाटा ८ करोड रुपैयाँ बढेर कुल ५७ करोड रुपैयाँ पुग्ने भएको छ । यसअघि घाटा मासिक ४९ करोड रुपैयाँ थियो ।
अन्तर्राष्ट्रिय बजारमा निरन्तर पेट्रोलियमको भाउ बढेपछि यसको असर निगमलाई परेको हो । इन्डियन आयल कर्पोरेशन (आईओसी) ले पठाएको नयाँ मूल्य सूचीअनुसार डिजेलमा ४० पैसा घाटा भएको निगमका प्रवक्ता भानुभक्त खनालले बताए । पेट्रोलमा प्रतिलिटर ५६ पैसा नाफा ४० पैसा मूल्य बढेपछि नाफा घटेर १६ पैसामा झरेको खनालले जानकारी दिए ।
नोक्सान थप भए पनि पेट्रोलियमको मूल्य यथावत राखिएको उनले जानकारी दिए ।
हाल पेट्रोलको मूल्य प्रतिलिटर १०१ रुपैयाँ ५० पैसा, डिजेलको ७७ रुपैयाँ ५० पैसा र खाना पकाउने एलपी ग्यास १ हजार ३२५ रुपैयाँ छ । लगातार नोक्सानमा रहेको निगम पछिल्लो १ वर्षयता नाफामा सञ्चालन भए पनि अन्तर्राष्ट्रिय बजारमा मूल्य बढेपछि नोक्सानमा जान थालेको हो ।