संशोधनको नाममा संविधान कार्यान्वयनलाई अड्काउन पाईदैनः गुरुङ

चितवन, माघ २५–

नेपाली काँग्रेसका केन्द्रीय सदस्य धनराज गुरुङ्ले संशोधनको नाममा संविधान कार्यान्वयनलाई अड्काउन नमिल्ने बताउनु भएको छ । नेपाली काँग्रेस चितवन क्षेत्र नम्वर–४ ले काँग्रेसका पूर्व सभापति एवं पूर्व प्रधानमन्त्री स्व. सुशिल कोईरालाको प्रथम स्मृति दिवसको अवसरमा वृहत निःशुल्क स्वास्थ्य शिविरको उद्घाटन गर्दै यस्तो बताउनु भएको हो ।

कोईरालाले संविधान जारी गरेको भन्दै उहाँको सम्मानका लागि संविधान कार्यान्वयन आवश्यक रहेको बताउनु भयो । संविधान कार्यान्वयनले मात्र पूर्व प्रधानमन्त्री कोईरालाको सम्मान हुने बताउनु भयो । अहिले संविधान कार्यान्वयन गर्न निर्वाचन गरेर अघि बढ्नु आवश्यक रहेको नेता गुरुङ्ले बताउनु भयो । पछिल्लो समयमा संविधान कार्यान्वयनमा देखिएको चुनौंतीलाई समाधान गर्दै अघि बढ्न सबै दल एक ठाउँमा हुनुपर्ने उहाँले बताउनु भयो ।

कोईरालाले संविधान जारी गर्ने समयमा गरेको योगदानको कदर राजनैतिकदलहरुले गर्न नसकेको नेता गुरुङ्ले बताउनुभयो । सो अवसरमा व्यवस्थापिका संसद सदस्य विष्णुमाया परियार, नेपाली काँग्रेसका पूर्व जिल्ला सभापति टेकप्रसाद गुरुङ्, नेपाली काँग्रेस चितवन क्षेत्रीय सचिव गोपाल दराई लगाएतले बोल्नु भएको थियो । शिबिरमा आँखा, नाक कान घाँटी रोग विशेषज्ञ, मेडिकल विभाग, स्त्रीरोग विशेषज्ञ, छाला रोग विशेषज्ञ, हाडजोर्नि रोग, बालरोग, मानसिक रोग विशेषज्ञले सेवा दिएका थिए ।

कार्यक्रम नेपाली काँग्रेस चितवन क्षेत्र नम्वर ४ का क्षेत्रीय सभापति सरिता केसीको अध्यक्षतामा सम्पन्न भएको थियो ।