काठमाडौं,माघ २१-

बिहीबार जनकपुरबाट पक्राउ परेका डा सीके राउतलाई सिराहा जिल्ला अदालतले १० दिन थुनामा राख्न म्याद दिएको छ । राउतलाई संगठित अपराध ऐेन अर्न्तगत थुनामा राख्न आदेश दिएको हो ।

लामो समयदेखि विखण्डनको राजनीति र तराईलाई नेपालबाट छुट्ट्याई फरक राज्य बनाउने खुला अभियानसँगै अन्तर्राष्ट्रिय समुदायको अनुमोदन हासिल गर्न सक्रिय राउतलाई बिहीबार जनकपुरस्थित उनको डेराबाट प्रहरीले पक्राउ गरेको थियो । उच्च प्रहरी स्रोतका अनुसार राउतमाथि राज्यविप्लव, संगठित अपराधमा संलग्नता र सामाजिक विद्वेष फैलाएको आरोपमा छानबिन हुँदैछ ।

उनको संगठन स्वतन्त्र मधेस गठबन्धनको सक्रियता बढेपछि सिराहा प्रहरीले उनलाई पक्राउ गरेको हो । माघ ५ गते लाहानको सहिद पार्कमा आयोजित बलिदानी दिवस कार्यक्रममा राउतले राज्य टुक्र्याउने खालका विवादास्पद अभिव्यक्ति दिएको र उनले राष्ट्रिय अखण्डतामा प्रभाव पार्ने खालका विभिन्न गतिविधि गरेको प्रमाणका आधारमा प्रहरीले उनलाई दिउँसो ३ बजे पक्राउ गरेको हो ।

जनकपुरको पुरानो बसपार्क नजिकैको भाडाको घरबाट उनलाई प्रहरीले पक्राउ गरेको थियो । उनलाई पक्राउ गरी बिहीबार नै सिराहा पुर्याइएको थियो।

राष्ट्र विखण्डन गर्ने अभिव्यक्ति दिँदै आएका राउतलाई पक्राउ गरी सहयोग गरिदिन सिराहा प्रहरीले आग्रह गरेपछि उनलाई पक्राउ गरिएको जानकारी धनुषाका प्रहरी उपरीक्षक लालमणि आचार्यले गराएका छन् । पक्राउ परेका राउतविरुद्ध शुक्रबार नै मुद्दा दर्ता गर्ने तयारी रहेको जानकारी सिराहाका प्रहरी उपरीक्षक शेखर कोइरालाले दिएका छन् ।

एक मानवअधिकारकर्मीले राउतमाथि कारबाही नगरेर गृहमन्त्री विमलेन्द्र निधिले विखण्डनकारी शक्तिलाई संरक्षण दिएको आरोप लगाएको भोलिपल्टै निधिकै गृहजिल्लाबाट प्रहरीले उनलाई पक्राउ गरेको हो । उनको अभियानमा प्रत्यक्ष वा परोक्ष रूपमा सहयोग पुर्‍याएको आरोप संयुक्त राष्ट्रसंघको विराटनगरस्थित फिल्ड अफिस र युरोपेली युनियनमाथि लाग्दै आएको छ ।

राउतले सञ्चालन गरेको गठबन्धनले पछिल्लो समयमा खुलेआम मधेसलाई देशबाट टुक्र्याउने खालका अभिव्यक्तिसहितका कार्यक्रम सञ्चालन गर्दै आएको छ । यसै क्रममा गत मंसिर १० गते गठबन्धनका कार्यकर्ताले रंगभेद विरोध दिवस मनाउने क्रममा जनकपुरबाट ३२ जना कार्यकर्तालाई प्रहरीले पक्राउ गरी सोही दिन साँझ रिहा गरेको थियो ।

मंसिर १९ गते जनकपुरको ऐतिहासिक रामजानकी विवाहमहोत्सवका अवसरमा बाहिरबाट आएका श्रद्धालुलाई पानी खुवाइरहेका राउतका कार्यकर्ताले ‘मधेस स्वराज’ लेखेको टोपी लगाएको भन्दै प्रहरीले पक्राउ गरेको थियो । मंसिर २१ गते जनकपुरको जानकी मन्दिरमा फोहोरमैला सफा गर्न लागेका बेला पनि राउतका कार्यकर्ता पक्राउ परेका थिए ।

राउतका कार्यकर्ताले सार्वजनिक कामका नाममा देश टुक्र्याउने खालको सन्देश जाने ‘म स्वराजी हुँ, मलाई चाहियो स्वराज’ लगायत नारा लेखिएको टोपी लगाएकाले नियन्त्रणमा लिनुपरेको प्रहरीले जनाएको छ ।

‘राष्ट्रिय सुरक्षामा चुनौती’

सरकारले स्वतन्त्र मधेस गठबन्धनका संयोजक सीके राउत र नेकपा (माओवादी) का महासचिव नेत्रविक्रम चन्दले राष्ट्रिय सुरक्षामा चुनौती थपेको विश्लेषण गरेको छ ।

उपप्रधान तथा गृहमन्त्री विमलेन्द्र निधिले राउत र चन्दका गतिविधि राष्ट्रिय सुरक्षालाई चुनौती दिने प्रकृतिका रहेको विश्लेषण गरेका हुन् । राउतलाई जनकपुरमा पक्राउ गरेपछि बिहीबार सिंहदरबारमा बसेको मन्त्रिपरिषद् बैठकमा निधिले राष्ट्र विखण्डन गर्न खोज्नेलाई सरकारले नछोड्ने बताएका थिए ।

मुलुकको सुरक्षाअवस्था, राउतले सञ्चालन गर्दै आएको आन्दोलन, त्यसले शान्तिसुरक्षामा पुर्‍याएको चुनौतीको सूक्ष्म अध्ययन गरेर उनलाई पक्राउ गरिएको गृहमन्त्री निधिले प्रस्ट्याएका थिए ।

‘राष्ट्र विखण्डन गर्ने उद्देश्यले आन्दोलन गरिरहेका सीके राउतलाई मुद्दा चलाउनु पर्नेछ । पहिले पनि प्रहरीले पक्राउ गरी मुद्दा दर्ता गर्दा अदालतको आदेशमा रिहा गरिएको थियो’, निधिले बैठकमा राखेको भनाइ उद्धृत गर्दै एक मन्त्रीले अन्नपूर्णसँग भने, ‘राष्ट्र विखण्डन गर्न खोज्नेलाई बेपरबाह छोडिँदैन, नियन्त्रण गरिन्छ । झूटा झन्डा र स्वतन्त्र राष्ट्रको नारा लगाउँदै राष्ट्र विखण्डन गर्न खोज्ने राउतका बारेमा प्रहरीले सूक्ष्म ढंगले अध्ययन-अनुसन्धान गर्दै आएको थियो । त्यसकै आधारमा पक्राउ गरिएको हो ।’

निधिले नेत्रविक्रम चन्द नेतृत्वको माओवादीले आगामी फागुन १ गते काठमाडौंको खुलामञ्चमा महाधिवेशन उद्घाटन गरेर रोल्पाको थबाङमा बन्दसत्र गर्ने कार्यक्रम घोषणा गरेको भन्दै त्यसप्रति पनि सरकार संवेदनशील बनेको बताए । ‘चन्दका गतिविधि गम्भीर प्रकृतिका छन् तर अहिले नै धरपकड र थुनछेक गर्नुपर्ने देखिँदैन तर वाच गर्नुपर्ने देखिएको छ’, उनले बैठकमा भनेका थिए ।