मधेशी मोर्चा–सत्तारुढ दल बैठक बिनानिष्कर्ष टुंगियो, मोर्चाको स्पष्ट धारणा नै आएनःनारायणकाजी
काठमाडौ,माघ १७-
संविधान संशोधन विधेयक, निर्वाचन घोषणालगायत विषयमा छलफल गर्न सोमबार बसेको सत्तारुढ दल र मधेशी मोर्चाका नेताहरूको बैठक बिनानिष्कर्ष टुंगिएको छ । प्रधानमन्त्री निवास बालुवाटारमा बसेको बैठकमा सत्तारुढ नेपाली कांग्रेस तथा नेकपा माओवादी केन्द्रका नेताहरू र मधेशी मोर्चाको सहभागिता थियो ।
माओवादी केन्द्रका वरिष्ठ नेता नारायणकाजी श्रेष्ठले बैठकपछि दिएको जानकारीअनुसार बैठकमा मोर्चाको तर्फबाट स्पष्ट धारणा आएन । “पुरानै कुराहरू दोहोरिए । प्रधानमन्त्रीले संविधान संशोधन विधेयक र स्थानीय तहको चुनाव सँगसँगै लैजानुपर्छ भन्नुभयो, मोर्चाले पहिला संशोधन प्रस्ताव टुंग्याएर मात्र चुनावमा जानुपर्ने कुरा राख्यो,” श्रेष्ठले भने ।
बैठकमा प्रधानमन्त्रीले स्थानीय तहकै चुनावमा जानुपर्नेमा जोड दिएको उनले जानकारी दिए । उनका अनुसार प्रधानमन्त्री पुष्पकमल दाहाल अहिलेको गठबन्धन टुटाउनु हुँदैन भन्ने पक्षमा छन् ।
सद्भावना पार्टीका सहअध्यक्ष लक्ष्मणलाल कर्णले पहिला संधोशन प्रस्ताव टुंग्याएर मात्र चुनावमा जानुपर्नेमा मोर्चा दृढ रहेको बताए । मोर्चा र सत्तारुढ दल फेरि बसेर छलफल गरी सबै विषय टुंग्याउने कुरा भएको उनले जानकारी दिए ।
