धार्मिक सद्भावसँगै महोत्सव सुरु
बाँके, माघ ११–
बाँके जिल्लाको खजुरामा हिन्दू र इस्लाम धर्मगुरुलाई एकसाथ रथमा बजार परिक्रमा गराएर धार्मिक सद्भावको सन्देश प्रवाह गरिएको छ ।
धार्मिक सद्भावका हिसाबले अति महत्वपूर्ण मानिएको जिल्लाको बागेश्वरी गाविसको खजुरामा सोमबारदेखि सुरु भएको व्यापारिक महोत्सवको उद्घाटन अघि धर्मगुरुलाई एकसाथ रथ परिक्रमा गराइएको हो ।
हिन्दू धर्मका गुरु चन्द्रनाथ योगी र इस्लाम धर्म गुरु मौलाना जव्वार मञ्जरीलाई रथमा एकसाथ राखेर खजुरा बजार परिक्रमा गराइएको थियो ।
सामाजिक र धार्मिक सद्भावको जिल्लाव्यापी रुपमा प्रचारप्रसारका लागि धर्मगुरुलाई एकसाथ रथमा घुमाएर परिक्रमा गराइएको आयोजक आधुनिक युवा सञ्जालले जनाएको छ ।
आयोजक सञ्जालका अध्यक्ष तिलकवीर सुनारका अनुसार कृषि, पर्यटन प्रर्वद्धन, सांस्कृतिक एवम् ऐतिहासिक धार्मिक मुसबेटवा बाबा प्रथम व्यापारिक महोत्सव माघ २१ गतेसम्म सञ्चालन गरिनेछ ।
एकसय ७० वटा स्टल राखिएको महोत्सवमा रु ६० लाखको कारोबार हुने अपेक्षा राखिएको छ भने महोत्सवमा ७० हजारभन्दा बढी मानिसले अवलोकन गर्ने अनुमान गरिएको छ । सांसद दलबहादुर सुनारले भव्य समारोहकाबीच सोमबार महोत्सवको उद्घाटन गर्नुभयो ।
