चौथो खिचरा महोत्सव आजदेखि भव्य रुपमा सुरु हुँदै

चितवन, पुस २८–

‘चौथो खिचरा महोत्सव–२०७३ आजदेखि भव्य रुपमा सुरु हुँदैछ । महोत्सवको आजपूर्व अर्थमन्त्री एवंम चितवन क्षेत्र नम्बर १ का साँसद सुरेन्द्र पाण्डेले समुदघाटन गर्ने कार्यक्रम रहेको छ । उद्घाटनअघि आज बिहान ११ बजे चौबिसकोठीको बाबा पेट्रोल पम्पबाट बृहत झाँकीसहितको शोभायात्रा शुरु भई महोत्सव स्थलसम्म पुग्ने महोत्सव प्रचार–प्रसार उपसमितिका संयोजक सन्तकुमार चौधरीले जानकारी दिनुभयो । शोभायात्रामा आउने सहभागीका लागि टिकट नलाग्ने आयोजक थारु कल्याणकारिणी सभा क्षेत्र नम्बर ७ ले जनाएको छ ।
महोत्सवको प्रवेश टिकट शुल्क रु ४० र विद्यार्थीका लागि रु २० कायम गरिएको छ भने गेट पासको व्यवस्था पूर्ण रुपमा निशेध गरिएको छ । मूल आयोजक समितिमा रहनेहरुले समेत टिकट काट्नु पर्ने आयोजक समितिले जनाएको छ ।

महोत्सवमा थारु परिकारहरु चिचर, घोङ्घी, माछा, हाँसको मासु, नकगर रोटीलगायतको परिकारका स्टलहरु रहनुका साथै थारु समुदायका लोपोन्मुख सामग्रीहरु, कृषि परिसर र बाल उद्यान मुख्य आकर्षण रहने महोत्सव मुल समितिका संयोजक नारायणप्रसाद महतोले जाकारी दिनुभयो । महोत्सवमा हरेक दिन राष्ट्रिय तथा स्थानीय गायक कलाकार र थारु लगायत जातजातिका साँस्कृतिक नृत्य प्रस्तुत गरिने छ ।
महोत्सवको सुरक्षाको लागि खैरहनी इलाका प्रहरी कार्यालयले पुलिस हेल्प डेस्क सञ्चालन गर्ने प्रहरी निरीक्षक घजिन्द्रबहादुर कार्कीले जनाउनु भयो । महोत्सव माघ ५ गतेसम्म खैरहनीस्थित गौचरनमा हुनेछ ।
यस पटक महोत्सवको सह–आयोजकमा खैरहनी नगरपालिका रहेको छ भने सहयोगी संस्थाहरुमा चितवन उद्योग संघ, रत्ननगर उद्योग वाणिज्य संघ, खैरहनी उद्योग वाणिज्य संघलगायत संस्थाहरु रहेका छन् ।