चितवनमा ९७ लाख बक्यौता असुली

चितवन, पुस १४–

नेपाल विद्युत् प्राधिकरण भरतपुर वितरण केन्द्रले चालु आर्थिक वर्षको मङ्सिर मसान्तसम्ममा ९७ लाख २५ हजार ६ सय ४७ रुपैयाँ बक्यौता रकम उठाएको छ ।

कार्यालयले लामो समयदेखि महसुल नबुझाउनेको ग्राहकको लाइन काट्न थालेपछि बक्यौता रकम असुली गरेको हो । लाइन काटिएका ग्राहकमध्ये ५०६ जना ग्राहकले बक्यौता रकम बुझाएको कार्यालयले जनाएको छ ।

कार्यालयका इन्जिनियर राजेन्द्र पौडेलका अनुसार कार्यालयले पछिल्लो समयमा सरकारी कार्यालयप्रति पनि बक्यौता उठाउनका लागि लाइन काट्न थालेको छ । जसमध्ये कार्यालयले अहिलेसम्म जिल्ला शिक्षा कार्यालय, जिल्ला अदालत, जिल्ला जनस्वास्थ्य कार्यालय, डिभिजन सडक कार्यालयको निवास, नापी कार्यालयलगायतको लाइन काटेर बक्यौता असुल गरेको छ । अन्य बक्यौता रकम बढी रहेका कार्यालयको पनि लाइन काट्ने प्रक्रिया भइरहेको उहाँले बताउनुभयो ।

कार्यालयको सडक बत्तीसहित २६ करोड रुपैयाँ बराबरको बक्यौता रकम रहेको छ । जसमध्ये नौ करोड रुपैयाँ ग्राहकको रहेको छ । ग्राहकमध्ये सबैभन्दा धेरै एसके इलेक्ट्रिकको तीन लाख ५१ हजार ४ सय ६१ रुपैयाँ, सुलभ प्लास्ट्रिकको दुई लाख ७९ हजार ५ सय ४९ र चितवन कोल्ड स्टोरको दुई लाख ६३ हजार २ सय ९७ रुपैयाँ रहेको कार्यालयले जनाएको छ ।

लामो समयसम्म बक्यौता नतिर्ने चार सय ३५ ग्राहकलाई वितरण केन्द्रले कालोसूचीका लागि क्षेत्रीय कार्यालयमा पठाउने तयारी थालेको इन्जिनियर पौडेलले बताउनुभयो । उहाँका अनुसार विद्युत् माग गर्ने ग्राहकको चाप पनि कार्यालयमा बढी रहेको छ । मङ्सिर महिनामा मात्रै विद्युत्को माग गर्दै एक हजार १०५ जनाले निवेदन दिएका छन् । –रासस